लोकमत न्यूज नेटवर्कबीड : शहरात सोमवारी सकाळीच सार्वजनिक शिवजन्मोत्सव समितीच्या वतीने छत्रपती शिवाजी महाराज यांच्या पुतळ्यास पुष्पहार अर्पण करून अभिवादन करण्यात आले. यावेळी पोलीस अधीक्षक जी.श्रीधर, निवासी उपजिल्हाधिकारी चंद्रकांत सूर्यवंशी, उपजिल्हाधिकारी विकास माने, जि.प.सदस्य संदीप क्षीरसागर, शिवजन्मोत्सव समितीचे अध्यक्ष प्रा. विजय पवार, अपर पोलीस अधीक्षक वैभव कलुबर्मे, उपअधीक्षक सुधीर खिरडकर, उपनगराध्यक्ष हेमंत क्षीरसागर, माजी सभापती अमर नाईकवाडे, फारूक पटेल यांच्यासह प्रशासनातील अधिकारी, कर्मचारी, विविध संघटनांचे पदाधिकारी, कार्यकर्ते, नागरिक, महिला, पुरूष, युवक, युवती यांची मोठ्या संख्येने उपस्थिती होती.
दरम्यान, सकाळी आठ वाजेपासून बीड शहरातील विविध भागातून तरूणांनी दुचाकी रॅली काढली. दुचाकीला लावलेले उंच झेंडे, डोक्याला फेटे आणि जय भवानी, जय शिवाजीचा जयघोष करीत प्रत्येक रॅली छत्रपती शिवाजी महाराजांना अभिवादन करण्यासाठी शिवाजी चौकात येत होती. दुपारी १२ वाजेच्या सुमारास महिलांची रॅलीही येथे आली. सर्वांनी शिवाजी महाराजांना अभिवादन केल्यानंतर रॅली माँ जिजाऊ यांच्या पुतळ्याच्या दिशेने मार्गस्थ झाली. येथे जिजाऊंना वंदन करून रॅलीचा समारोप करण्यात आला. सर्व दुचाकी रॅली शहरातील मुख्य रस्त्यांवरून काढण्यात आल्या.सराव, कलाविष्कारनियोजनाचे तीन महिने सराव करुन ११ खाजगी बस, ४ कन्टेनर, काही मिनीबसमधून बीडमध्ये आलेल्या कलाकारांनी शुक्रवारपासून ज्ञानेश्वर स्कुलच्या मैदानात पुन्हा सराव केल्यानंतर सोमवारी सार्वजनिक शिवजयंती उत्सवात बीडकरांपुढे आपला कलाविष्कार सादर केला.शिवस्तुती, रुद्रतांडव आणि कोल्हापूरनिर्मित खास करवीर नाद प्रस्तुत करत ढोलपथकाने व गोवा, ओरिसा आणि मणिपूरच्या पथकांनी कलाप्रकार सादर करत बीडकरांना जिंकले.बीडसाठी एकत्र येतात हौशीया पथकातील सर्व कलाकार हौशी आहेत. यात कोल्हापूर, कागल, पट्टणकोडोली, हुपरी, ठाणे येथील पाच पथकांचा समावेश आहे. हे कलाकार महाविद्यालयात शिक्षण घेणारे, अभियंता, वैद्यकीय, शिक्षण, उच्चशिक्षण, नवउद्योजक क्षेत्रातील होते.
तीन महिन्यांपासून नियोजनबीड येथील शिवजयंतीसाठी मागील तीन महिन्यांपासून हे पथक तयारी करत होते.पाच ठिकाणचे कलाकार समन्वय ठेवून या गावी, त्या गावी जाऊन कलाप्रकाराचा सराव करत होते.
अशी निघाली मिरवणूकदुपारी १२ वाजल्यापासूनच डॉ. बाबासाहेब आंबेडकर यांच्या पुतळ्याजवळ शिवजन्मोत्सव समितीच्या संयोजकांनी नियोजन केले. दुपारी ३ वाजल्यापासून मिरवणुकीस प्रारंभ झाला. माळीवेस, सुभाष रोड, साठे चौक, जालना रोड मार्गे छत्रपती शिवाजी महाराज यांच्या पुतळ्याजवळ मिरवणुकीचा समारोप झाला.
दोन पिढ्यांचा सहभागया ढोल पथकातील अवघे ६ वर्ष असलेला सर्वात लहान कोल्हापुरचा गुरुराज प्रेक्षकांचे लक्ष वेधून घेत होता. विशेष म्हणजे या पथकात त्याची आई निलम आणि वडील गणेश मांडवकरही सहभागी होते. सर्वांत वयस्कर ६७ वर्षांचे व्यावसायिक असलेले विजय धर्माधिकारी तरुणांनाही लाजवित होते. त्यांची कन्या जान्हवी देखील पथकात होती.
भारतात एकमेव बीड...मी नॅशनल इव्हेंट आॅर्गनाइझ करतो. मात्र, संपूर्ण भारतात बीड हे एकमेव शहर आहे, जिथे खाजगी इव्हेंट असुनही आॅल इंडियातून कलापथक निमंत्रित केले जातात, हे वैशिष्ट्य आहे. बीडच्या सार्वजनिक शिवजयंती उत्सव समितीशी माझ्या सहा वर्षांच्या ऋणानुबंधामुळे सर्वात आधी बीडलाच आम्ही प्राधान्य देतो.
- विनोद साळोखे, समन्वयक,उत्सव इव्हेंट तथा भारतीय कलासंस्कृती अकादमीचे सचिव.