लग्नाच्या शूटिंगसाठी ड्रोन वापरणार असाल तर सावधान!

बीड : लग्नसमारंभ, मेळावे, राजकीय सभांच्या वेळी अनेक ठिकाणी ड्रोन उडवण्याचा ट्रेंड आला आहे. प्री वेडिंग किंवा वेडिंग शूटिंग ड्रोनद्वारे करायची असेल, तर परवानगी असलेला ड्रोनच हवा. सार्वजनिक सुरक्षिततेच्या दृष्टीने हे आवश्यक आहे. अन्यथा कारवाई होऊ शकते. नवीन ड्रोन अद्यावत असले तरी आपण ते काळजीपूर्वक उडविणे महत्त्वाचे आहे. बीड शहरातही हौशी तसेच व्यावसायिक फोटोग्राफर फोटोग्राफीसाठी ड्रोनचा वापर करतात. नवीन आलेल्या ड्रोनमध्ये सेन्सर सिस्टिम आहे. त्यामुळे धडकण्याचा प्रकार होत नाही. ड्रोन जागेवरच थांबते. तसेच इमेज फॉलो सिस्टीमही आली आहे. वाहनाची किंवा व्यक्तीची शूटिंग करताना ड्रोन ऑटोमॅटिक फॉलो करते. त्यामुळे हे नवीन ऑप्शन फार चांगले आहे. आपण आपल्या ड्रोनद्वारे अनेक चांगले दृश्य टिपू शकतो. व्हिडिओ क्षेत्रात ड्रोन आल्यामुळे क्रांतीच झाली असली तरी ते वापरताना नियमांचे भान ठेवणे गरजेचे आहे.

----------

ड्रोन वापरण्याचेही नियम

ड्रोन अधिकाधिक लोकप्रिय होत असले तरी उड्डाण करणे हे बऱ्याच जबाबदाऱ्यांशी संबंधित आहे. ड्रोनसाठी लागू असलेले नियम जाणून घेणे आणि त्यास व्यवहारात लागू करण्याचे कायदेशीर बंधन आहे.

----------

बेकायदेशीरपणे उड्डाण करताना दंड होण्याचे किंवा कायदेशीर कारवाई होऊ शकते. निष्काळजी उड्डाणांमुळे होणाऱ्या नुकसानीस ड्रोन ऑपरेटर जबाबदार ठरू शकतो.

-----------

हवाई वाहतूक सुरक्षेच्या हितासाठी आणि शांतता आणि सार्वजनिक सुव्यवस्था राखण्यासाठी बंधने पाळणे आवश्यक आहेत. विमानतळ, रेल्वे, प्रतिबंधित क्षेत्र, संवेदनशील भागात ड्रोन उडविण्यावर प्रतिबंध आहे. तसेच या भागात ड्रोनचे जीपीएस लॉक होते.

----------

ज्या भागात चित्रीकरण केले जाणार आहे, त्या भागातील संबंधित पोलीस ठाणे, हॉटेल, रिसोर्ट, मंगल कार्यालयांकडून रितसर विशेष परवानगी घेणे आवश्यक आहे. मोठ्या शहरातील हॉटेलमध्ये विशिष्ट नमुन्यातील अर्ज भरून घेतला जातो.

----------

ड्रोनची वेगमर्यादा व उंची ही मर्यादित ठेवावी आपल्या ड्रोनचे शासन नियमानुसार ऑनलाईन रजिस्ट्रेशन करून घ्यावे. शक्यतो संवेदनशील जागेत ड्रोन उडवताना संबंधित पोलीस स्टेशनमधून डीवायएसपी कार्यालयातून परवानगी घ्यावी. - महेश तिवारी, बीड.------------

ड्रोन उडवण्यासाठी लायसन हवे!

दीड वर्षापूर्वी पोलीस उपअधीक्षक कार्यालयात ड्रोन व्यावसायिकांना बोलावून त्यांची ऑनलाईन नोंदणी करून माहिती भरून घेतली होती. यात ड्रोन मॉडेल, क्षमता, आकार, मालकाचे तसेच ऑपरेटरचे नाव आदी उल्लेख असणारी माहिती नोंदवून शासन निर्देशित संकेतस्थळावर ही नोंदणी प्रक्रिया पूर्ण केली होती. मात्र आता नवीन ड्रोन घेणाऱ्यांना शासकीय नियमांचे सोपस्कर आधी पूर्ण करावे लागतात.

परवानगी सर्वांच्या दृष्टीने महत्त्वाची

ड्रोनची वेगमर्यादा व उंची ही मर्यादित ठेवावी आपल्या ड्रोनचे शासन नियमानुसार ऑनलाईन रजिस्ट्रेशन करून घ्यावे. शक्यतो संवेदनशील जागेत ड्रोन उडवताना संबंधित पोलीस स्टेशनमधून डीवायएसपी कार्यालयातून परवानगी घ्यावी. शासन आणि आपल्या दृष्टीने हे महत्त्वाचे आहे. तसेच सुरक्षेच्या दृष्टीने ही परवानगी घेतली पाहिजे. - महेश तिवारी, छायाचित्रकार, बीड.

शुटिंगचा खर्च कौशल्यावर

लग्नसमारंभ, किंवा प्रिवेडिंग शूटिंग किंवा राजकीय अथवा मोठ्या सार्वजनिक कार्यक्रमात ड्रोनद्वारे छायाचित्रणाची मागणी अलीकडच्या काळात वाढलेली आहे. दृश्य, प्रसंग व ऑर्डरनुसार शूटिंगचे दर मिनिटानुसार अथवा एकूण कालावधीनुसार ठरतात. ३० मिनिटांसाठी साधारणत: ५ ते ७ हजार रुपये दर आकारले जातात. तर अनेक व्यावसायिक त्यांच्या कामाची गुणवत्ता, कौशल्याच्या बळावर शूटिंगचे दर ठरवतात, असे छायाचित्रकार राजू शिंदे यांनी सांगितले.

---------