चाहूर तांड्याच्या पोराचा मुंबईत गौरव

हारकी निमगाव : माजलगाव तालुक्यातील चाहुरतांडा येथील रहिवासी सुनील पवार याने मुंबई पोलीस दलात आपल्या कामगिरीतून छाप पाडली. मुंबई पोलीस प्रशासनात उत्कृष्ट कामगिरी केल्याबद्दल पोलीस सहआयुक्त विश्वास नांगरे पाटील यांच्या हस्ते उत्कृष्ट कामगिरी केल्याबद्दल सुनील पवार यांचा रिवाॅर्ड, सन्मानपत्र देऊन गौरव करण्यात आला. एका छोट्याशा खेड्यातून अथक मेहनत, जिद्द, चिकाटीच्या जोरावर सुनील पवार हे पोलीस दलात रुजू झाले. एका गरीब शेतकरी कुटुंबात जन्मलेल्या सुनील पवार यांनी कठीण परिश्रम घेत प्रतिकुलतेवर मात केली. पहिली ते चौथीपर्यंतचे शिक्षण जिल्हा परिषद प्राथमिक शाळा चाहूर तांडा येथे झाले. पाचवी ते दहावीपर्यंतचे शिक्षण माध्यमिक शाळा तालखेड येथे झाले, तर अकरावी ते बी. ए. पर्यंत सुंदरराव सोळंके महाविद्यालयात शिक्षण घेतले. यादरम्यान आपल्या आई-वडिलांना शेतीकामात मदत करतानाच बुद्धिमत्ता व शारीरिक सुदृढतेच्या बळावर सुनील पवार पोलीस प्रशासनात दाखल झाले. कर्तव्यात कसलीही कसर न ठेवता मुंबईसारख्या ठिकाणी आपल्या कार्याची छाप पाडली. या कामाची पावती म्हणून हा गौरव करण्यात आला.

----सुनील पवार यांना सन्मानपत्र व रिवाॅर्ड देताना विश्वास नांगरे पाटील व अन्य अधिकारी.

===Photopath===

290521\29bed_3_29052021_14.jpg