अंबाजोगाईत इलेक्ट्रॉनिक दुचाकीच्या शोरूमला आग

अंबाजोगाई : अंबाजोगाई शहरातील प्रशांतनगर भागात असलेल्या इलेक्ट्रॉनिक दुचाकीच्या शोरूमला लागलेल्या आगीत ६ दुचाकीसह फर्निचरचे लाखो रुपयाचे नुकसान झाले असल्याची संबंधितांनी सांगितले.

या आगीमध्ये दुचाकी दुरूस्ती करणारा तंत्रज्ञ जखमी झाला असून त्याच्यावर स्वा.रा.ति. रुग्णालयात उपचार सुरू आहेत. ही घटना शुक्रवारी दुपारी घडली. घटनास्थळी अग्निशामक दलाने शर्तीचे प्रयत्न केल्यामुळे आतील कामगारांना सुखरूप बाहेर काढण्यात यश आले व आग आटोक्यात आली.

अंबाजोगाई शहरातील भर वस्तीतील प्रशांतनगर भागात विराज जगदाळे यांचे जगदाळे इलेक्ट्रॉनिक मोटार्स सायकलचे शोरूम आहे. शुक्रवारी दुपारी एक दुचाकी मेकॅनिक मयूर व्यंकट शिंदे (वय १९ रा. होळ) हे दुरूस्त करीत असताना दुचाकीतील बॅटरीचा स्फोट झाल्याने इतर सहा दुचाकींनी पेट घेतला. इलेक्ट्रॉनिक दुचाकी असल्याने बॅटऱ्यांचा स्फोट झाल्याने शोरूमला पूर्ण आगीने वेढले. यातील कामगार जीव वाचवण्याच्या उद्देशाने बाहेर सैरावैरा पळू लागले.

आगीची माहिती मिळताच नगरपरिषदेच्या अग्निशामक दलाला तत्काळ पाचारण करण्यात आले. या दलाच्या कर्मचाऱ्यांनी संपूर्ण आग आटोक्यात आणण्यासाठी शर्थीचे प्रयत्न केले. तसेच शोरूममध्ये अडकलेल्या कामगारांना बाहेर काढण्यात यश आले. परंतु यातील दुचाकी दुरूस्ती करणारा मयूर व्यंकट शिंदे हा आगीमध्ये भाजल्याने जखमी झाला. त्याला उपचारासाठी स्वा.रा.ति. रूग्णालयात दाखल करण्यात आले. त्याची प्रकृती स्थिर असल्याचे उपचार करणाऱ्या डॉक्टरांनी सांगितले.

सदरील आगीचा प्रकार हा बॅटरीच्या स्फोटामुळे घडला असल्याचे निदर्शनास येत आहे. महसूल व पोलीस प्रशासनाच्या वतीने या घटनेचा पंचनामा करण्यात येत आहे.

020721\img-20210702-wa0137_14.jpg~020721\img-20210702-wa0107_14.jpg