८० हजारांची लाच स्वीकारताना फौजदारास अटक

आष्टी (जि.बीड) : एका गुन्ह्यातील आरोपीचा अटकपूर्व जामीन उच्च न्यायालयाकडून रद्द न करण्यासाठी एक लाखांच्या लाचेची मागणी करून ८० हजार रुपयांत तडजोडीला तयार झालेला अंभोरा (ता. आष्टी) पोलीस ठाण्यातील पोलीस उपनिरीक्षक लाचलुचपत प्रतिबंधक विभागाच्या जाळ्यात अडकला. सोमवारी दुपारी त्याच्यावर अंभोरा ठाण्यातच गुन्हा दाखल करण्यात आला आहे.

राहुल पांडुरंग लोखंडे (रा. तिरुपती पार्क, पिसादेवी रोड, औरंगाबाद ) असे लाचखोर पोलीस उपनिरीक्षकाचे नाव आहे. सध्या त्याची नेमणूक अंभोरा ठाण्यात आहे. अंभोरा ठाण्यात दाखल असलेल्या एका गुन्ह्यातील आरोपीचा मंजूर असलेला अटकपूर्व जामीन उच्च न्यायालयाकडून रद्द न करण्यासाठी व गुन्ह्यात असलेल्या गाड्या जप्त न करण्यासाठी लोखंडेने एक लाख रुपयांची मागणी केली होती. याबाबत तक्रार प्राप्त झाल्यानंतर एसीबीच्या औरंगाबाद येथील पथकाने पडताळणी केली असता, त्यात तडजोडीअंती लोखंडे याने ८० हजार रुपये स्वीकारण्याचे मान्य केले असल्याचे सिद्ध झाले. त्याआधारे राहुल लोखंडे याच्यावर गुन्हा दाखल करण्यात आला आहे. या प्रकरणाचा पुढील तपास पोनि. गणेश धोकर हे करीत आहेत.

राहुल लोखंडे झाला फरार

या प्रकरणातील आरोपी उपनिरीक्षक राहुल लोखंडे याच्यावर गुन्हा दाखल झाल्याची माहिती मिळताच राहुल लोखंडे हा फरार झाला असून, त्याचा शोध अंभोरा पोलीस घेत आहेत, तर काही पोलीस प्रशासनातील अधिकारी, कर्मचारी त्याला मदत करत असल्याचा आरोप ग्रामस्थांकडून करण्यात आला आहे.

गुन्हा दाखल होताच वाजले फटाके

राहुल लोखंडे यांच्यावर लाचेची मागणी केल्याचा गुन्हा दाखल झाल्याची माहिती ग्रामस्थांना मिळताच त्याठिकाणी ग्रामस्थांनी फटाके वाजवून गुन्हा दाखल झाल्याचा आनंद व्यक्त केला, तसेच सखोल चौकशी करून सेवेतून बडतर्फ करण्याची मागणी नागरिकांमधून केली जात आहे.

260721\26_2_bed_18_26072021_14.jpg

राहुल लोखंडे