अति दुर्मिळ वृक्ष-वेलींचे नंदनवनात होणार जतन

दुर्मिळ कृष्ण वडाने नंदनवनाच्या वैभवात भर

शिरूर कासार : सर्पराज्ञीत गतवर्षी १ जुलैरोजी कृषी दिनाचे औचित्य साधून उभारलेल्या तीन हजार वृक्षांच्या रामवनाचा प्रथम वर्धापन दिन दुर्मिळ, अति दुर्मिळ वृक्ष-वेलींचे नंदनवन निर्माण करून साजरा करण्यात आला. कृष्ण वडाचे रोपण विभागीय वन अधिकारी अमोल सातपुते यांच्याहस्ते गुरुवारी करण्यात आले. कृष्ण वडाने नंदनवनाच्या वैभवात भर पडली असल्याचे सातपुते यांनी यावेळी सांगितले .

या नंदनवनाचा प्रारंभ अत्यंत दुर्मिळ असलेल्या कृष्णवडाचे विभागीय वन अधिकारी अमोल सातपुते यांच्याहस्ते रोपण करून करण्यात आला. अत्यंत दुर्मिळ असलेली वनसंपदा दिवसेंदिवस नष्ट होऊ लागली आहे. ही वनसंपदा जतनाचे कार्य सर्पराज्ञीने नंदनवनाच्या माध्यमातून हाती घेतले आहे. असे मत अमोल सातपुते यांनी यावेळी व्यक्त केले.

अमोल सातपुते, क्षितिज हिर्लेकर, सचिन नलावडे व सर्पराज्ञीचे संचालक सिद्धार्थ सोनवणे, सृष्टी सोनवणे यांच्या संकल्पनेतून सर्पराज्ञीत एक एकर जागेत साकारत असलेले दुर्मिळ, अतिदुर्मिळ वृक्ष-वेली नंदनवनाची उत्सुकता निसर्गप्रेमींना लागली आहे.

नंदनवनामध्ये कृष्णवड, पिवळा पळस, पांढरा पळस, पांढरा पांगारा, लाल हादगा, कौशी, कोशिंब, गुलाबी बहावा, पांढरा बहावा, कैलासपती, रुद्राक्ष, गोरखचिंच, पिवळी काटेसावर, मोहा, काळीनिरगुडी, निर्मली, राळवृक्ष, वायवर्ण, कुचला, नागकेशर, लोध्र, डुक्कर कंद, महावेल, काळीगुंज, पांढरी गुंज आदी २०० अत्यंत दुर्मिळ व दुर्मिळ लोप पावत चाललेल्या वृक्ष-वेलींची लागवड केली जाणार आहे. त्यांचे संरक्षण संवर्धन आणि जतन नंदनवनात केले जात आहे. नंदनवनाच्या शेजारी पंचवटी वन तयार करण्यात आले आहे. यावेळी वनपरिक्षेत्र अधिकारी संदीप शिंदे, संदीप वायबसे, सुधाकर कंठाळे, जालिंदर भसकरे आदी उपस्थित होते .

कृष्णवडाचे विशेषत्व

कृष्णवड नावाने परिचित असलेला हा वृक्ष नेहमीच्या वडापेक्षा वेगळा असून, अत्यंत दुर्मिळ आहे. या वडाची पाने निसर्गत:च द्रोणाच्या आकाराची असतात. त्याचे शास्त्रीय नाव ‘फा कृष्णि’, तर इंग्रजी नाव ‘कृष्णाज बटरकप’ असे आहे. कृष्ण यमुनातीरी या द्रोणात लोणी, रानमेवा, गोपाळकाला खात असे, अशी कथा सांगितली जाते. या वृक्षास हिंदू तसेच बौद्ध धर्म पवित्र मानतात.

सिद्धार्थ सोनवणे

(वन्यजीव अभ्यासक)

वृक्षदान, श्रमदान आणि अर्थदान रूपात दान यज्ञात सहभागी व्हा

सर्पराज्ञीत साकारत असलेल्या दुर्मिळ अति दुर्मिळ वृक्षवेलींच्या जतनासाठी तुम्हीही सहभागी होऊ शकता. तुम्ही या नंदनवनाच्या उभारणीसाठी वृक्षदान, श्रमदान, बीजदान आणि अर्थदानाची मदत करून सहभागी होऊन निसर्ग संवर्धनासाठी मदत करू शकता .

020721\img-20210701-wa0030.jpg

राम वनात कृष्ण वडाचे वैभव