पायरीचे दर्शन घेऊनच गृहस्थाश्रमात प्रवेश

.....

शेतकऱ्यांना मोठ्या पावसाची प्रतीक्षा

शिरूर कासार : तालुक्यात पावसाने सुरुवात चांगली केली होती. परिणामी जवळपास ५० टक्के पेरणीचे काम पूर्ण झाले. मात्र गेल्या सहा-सात दिवसांपासून पावसाने दडी मारल्याने ये रे ये रे पावसा.. म्हणण्याची वेळ शेतकऱ्यांवर आली आहे. शेतकऱ्यांना मोठ्या पावसाची प्रतीक्षा आहे.

...

स्वच्छतेचे धिंडवडे

शिरूर कासार : नगरपंचायतीने स्वच्छ शहर या उपक्रमात सहभाग घेतला असून, सर्व शहर स्वच्छ दिसत असले तरी काही नजरेच्या पलीकडे मात्र स्वच्छतेचे धिंडवडे निघत असल्याचे चित्र आहे. कालिका देवी मंदिराच्या दक्षिणेला असे चित्र दिसत आहे. या परिसरात स्वच्छता करावी, अशी मागणी होत आहे.

...गुरुजी शाळेत अन् विद्यार्थी घरी

शिरूर कासार : कोरोना महामारीच्या भीतीपोटी व विद्यार्थ्यांच्या सुरक्षेसाठी गतवर्षी शाळा बंद होत्या. तीच पुनरावृत्ती याही वर्षी होत आहे. शाळा व शैक्षणिक वर्ष सुरू झाले. गुरुजी शाळेत मात्र विद्यार्थी घरीच ऑनलाइन अध्यापन घेत असल्याने शाळांच्या प्रांगणाचे चैतन्य हरवले असल्याचे दिसून येत आहे.

...

खांब्याला पाच, तर तिंतरवणीत सहा कोरोनाबाधित आढळले

शिरूर कासार : तालुका आजही कोरोनाच्या बाबतीत भीतीच्या सावटाखाली असल्याचे दिसून आले. मंगळवारी तालुक्यात आठ रुग्ण होते. मात्र बुधवारी कोरोनाने उसळी घेत हा आकडा बावीसवर गेला असल्याने तालुका भीतीच्या सावटाखाली आहे. खांब्यात पाच तर तिंतरवणीत सर्वाधिक सहा बाधित रुग्ण आढळले, तर तागडगाव व आनंदगावमधे प्रत्येकी दोन आणि टेंभुर्णी, खालापुरी, आर्वी, वडळी, तरडगव्हाण, वारणी आणि उकिर्डा चकला या गावांत प्रत्येकी एक बाधित असल्याचे कोरोना अहवालात दिसून येते. वाढता आकडा पाहता नागरिकांनी बेसावध राहू नये. कोरोना नियमावलीचे पालन करावे, असे आवाहन प्रशासनाने केले आहे.

...

दोन दिवसात शिरूर शहर निरंक

शिरूर कासार : तालुक्यातील कोरोनाबाधितांचा आकडा हा कमी अधिक असा अस्थिर असल्याचे दिसून येत आहे. तरी मंगळवार व बुधवारी दोन दिवस शहर निरंक राहिले. एकही रुग्ण शहरात सापडला नाही. हे दिलासादायक असले तरी बाजारात सर्व व्यवहार सुरू आहेत. बाजारात होणारी गर्दी ही धोक्याची नांदी ठरण्याची शक्यता नाकारता येणार नाही. कोरोनाचे फारसे गांभीर्य घेतले जात नसल्याचेही चित्र आहे.