कोरोनाच्या संकटात सापडल्या इंग्रजी शाळा

अविनाश कदम

आष्टी : गेल्या १८ महिन्यांपासून कोरोनामुळे इंग्रजी शाळा, जिल्हा परिषद शाळा, महाविद्यालये शासनाने बंद ठेवण्याचा निर्णय घेतला. या निर्णयामुळे खासगी इंग्रजी माध्यमाच्या शाळा ऑनलाईन पद्धतीने मुलांना शिक्षण दिले जात आहे, परंतु पालकांनी वेळेत फीस न भरल्यामुळे ऑनलाईन शिक्षण बंद होण्याच्या मार्गावर असून इंग्रजी माध्यमांतील शिक्षक, शिक्षिका, कर्मचाऱ्यांवर उपासमारीची वेळ आली आहे.

बीड जिल्ह्यात इंग्रजी माध्यमाच्या २०३ शाळा असून यापैकी अनेक शाळांनी ऑनलाईन शिक्षण देण्याचा निर्णय घेतला आहे. त्यांनी २०२० - २०२१ या वर्षात काही शाळांनी वेगवेगळ्या प्रकारे पालकांना फीमध्ये सवलत दिली आहे. या वर्षीही फीमध्ये सवलत देण्यात येत आहे. जिल्हा परिषदेचे मुख्य कार्यकारी अधिकारी अजित कुंभार यांनी खासगी इंग्रजी माध्यमाच्या शाळांना पत्र काढून सक्तीची फीस वसुली करू नका, विद्यार्थ्यांचे नुकसान करू नये असे सूचित केले आहे. पण इंग्रजी माध्यमाच्या शाळांच्या अडचणींबाबतही विचार करायला हवा होता. शाळांनी पालकांना फीमध्ये सवलत दिली आहे. शाळेची इमारत उभारण्यासाठी घेतलेले कर्ज, शिक्षक,शिक्षिका, इतर कर्मचाऱ्यांचे करावे लागणारे पगार या अडचणीच्या बाजू जिल्हा प्रशासनाने व पालकांनी समजून घ्याव्यात, असे संस्था चालकांनी सांगितले.

पालक, प्रशासनाने समजून घ्यावे

मुलांना सध्या ऑनलाईन शिक्षण इंग्रजी माध्यमाच्या शाळेतून दिले जात आहे. फीमध्ये टप्प्याटप्प्याने सवलत दिली आहे. कर्मचारी अन् ऑनलाईन शिक्षणाचा खर्च असल्याने पुढे ऑनलाईन शिक्षण सुरू ठेवण्यासाठी पालकांनी व प्रशासनाने शाळांचाही विचार करून मदत करावी. - नागसेन कांबळे, प्राचार्य, इंग्रजी माध्यम शाळा, आष्टी.

प्रशासन इंग्रजी शाळेच्या प्रश्नांबाबत उदासीन

इंग्रजी माध्यमाच्या शाळांबाबत जिल्हा प्रशासनाने जे पत्रक काढले आहे. त्याआधी इंग्रजी माध्यमाच्या संस्था चालकांची बाजू समजून निर्णय घ्यायला हवा होता. - निखिल वाघमारे, राज्य सचिव, इंडिपेन्डेन्स इंग्लिश स्कूल ट्रस्टीज असोसिएशन.

पालकांनी सहकार्य करावे

जरी कोरोना संकटामुळे प्रशासनाचे नियम शाळांना बंधनकारक केले असले तरी आमच्या मुलांना शिक्षण घेणे गरजेचे आहे. सध्या शाळा ऑनलाईन शिक्षण देत आहेत. यासाठी शाळेने निर्धारित केलेली फी टप्प्याटप्प्याने पालकांनी भरावी. सर्व पालकांनी शाळेला सहकार्य करावे, असे मला वाटते. - राजेंद्र रोकडे, पालक आष्टी.

इंग्रजी माध्यमाच्या शाळांनी ५० टक्के सवलत द्यावी

कोरोनाच्या भयंकर काळात पालकांना अनेक अडचणींचा सामना करावा लागला आहे. अनेकांचे व्यवसाय ठप्प झाले आहेत. त्यामुळे आर्थिक बाबतीत अडचणींना तोंड द्यावे लागत असल्याने तरी इंग्रजी माध्यमाच्या शाळांनी ५० टक्के सवलती द्यावी, अशी आमची मागणी आहे . - एन. एच. शेख, पालक आष्टी ------------