उपसभापतीची वीज तंत्रज्ञाला जबर मारहाण

माजलगाव : तालुक्यातील ढोरगाव येथील लाईट लवकर का चालू करीत नाहीस म्हणून शिंदेवाडी फाटा येथे जाऊन महावितरण कंपनीच्या वरिष्ठ तंत्रज्ञाला मारहाण केल्यानंतर आपल्या दवाखान्यात आणून बाथरूममध्ये कोंडून पुन्हा मारहाण केल्याची घटना शनिवारी घडली. याप्रकरणी माजलगाव पंचायत समितीचे उपसभापती वसीम मनसबदार व अनोळखी पाच जणांविरोधात शासकीय कामात अडथळा व ॲट्रॉसिटी कायद्यानुसार गुन्हा दाखल झाला आहे.

विश्वास रोडे हे शिंदेवाडी तहत वसंतनगर तांडा या ठिकाणी शनिवारी दुपारी वीजबिल वसुलीचे काम करीत होते. यावेळी त्यांना पंचायत समितीचे उपसभापती डॉ. वसीम मनसबदार यांचा फोन आला. ढोरगाव येथील लाईट बंद आहे कधी चालू करणार असे विचारले, त्यावर इकडचे वसुलीचे काम संपल्यानंतर लाईट चालू करतो, असे रोडे यांनी सांगितले. परंतु मनसबदार यांनी लाईट आत्ताच सुरू कर व तू कुठे आहेस तिथेच थांब, असे म्हणून धमकावले. त्यानंतर डॉ. मनसबदार यांच्यासह अन्य पाच जण कारमधून शिंदेवाडी फाट्यावर आले. कारमधून उतरताच रोडे यांच्या तोंडावर चपटा मारत मुका मार देऊन बळजबरीने कारमध्ये घालून पात्रुड येथील डॉ. मनसबदार यांच्या दवाखान्यात आणले. तेथे बाथरूममध्ये कोंडून काठीने व पाईपने मारहाण केली. याप्रकरणी विश्वास रोडे यांच्या फिर्यादीवरून माजलगाव ग्रामीण पोलिसात शासकीय कामात अडथळा आणणे, मारहाण व ॲट्रॉसिटी कायद्यानुसार गुन्हा दाखल झाला. पोलीस उपअधीक्षक सुरेश पाटील तपास हे करीत आहेत.