शेतजमिनीचे नुकसान केल्याप्रकरणी सुरेश धसांसह ३७ जणांवर गुन्हा दाखल

दिलेल्या फिर्यादीत म्हटले आहे की, माझे पती मनोज चौधरी, दोन मुले तसेच सासरे सदाशिव, सासू अंजना असे आम्ही शेती व इतर व्यवसाय करून कुटुंबाची उपजीविका भागवत आहोत. माझे पती मनोज चौधरी हे समाजकार्य करीत असून विविध समाजकार्यात ते भाग घेतात. तसेच माझे सासरे सदाशिव पांडुरंग चौधरी यांच्या नावे पांढरी येथे बीड-नगर महामार्गावर जमीन गट नंबर ५९७ मध्ये २० गुंठे असून सदर जमिनीमध्ये मी रितसर एन. ए. करून घेतलेला आहे. त्या ठिकाणी संपूर्ण क्षेत्राला कंपाऊंड केले असून पक्के दोन मजली दगडी बांधकाम केलेले आहे. तिथे आम्हाला हाॅटेलचे काम करायचे होते. मी स्थानिक स्वराज्य संस्थामध्ये आमदार सुरेश रामचंद्र धस यांच्याविरुद्ध मुर्शदपूर, ता. आष्टी या गटातून २०१७ साली जि.प. निवडणूक लढविली होती. तेव्हापासून ते माझ्या पतीला राजकीय प्रतिस्पर्धक समजून सूडबुद्धीने नेहमीच माझ्या पतीविरोधात लोकांना भडकावून माझ्या पतीविरुद्ध खोट्या तक्रारी देण्याचा प्रयत्न करतात, असे फिर्यादीत म्हटले आहे.

आमच्या या जमिनीबाबत न्यायालयात सिंचन कार्यालयासोबत वाद चालू आहे. सिंचन विभागाला न्यायालयाने त्यांचे म्हणणे मांडण्यासाठी नोटीस काढली आहे. ज्यामध्ये न्यायालयाने ७ ऑगस्ट २०२१ ही तारीख दिलेली आहे. तत्पूर्वी १९ जुलै २०२१ रोजी न्यायालयात याबाबत सुनावणी झाल्यानंतर आमदार सुरेश धस व त्याचे समर्थक जेसीबी मशीनच्या साहाय्याने आमच्या जागेतील कंपाऊंड जमीनदोस्त करत आहेत व त्यातील सामान हे अज्ञात ठिकाणी घेऊन जात आहे, अशी माहिती मिळाली. तेव्हा मी, माझे पती, माझी दोन मुले, माझे सासू-सासरे सदर जागेची पाहणी करण्यासाठी गेलो असता त्या ठिकाणी आ. सुरेश धस व त्यांचे समर्थक गॅस कटर, जेसीबी पोकलेनच्या साहाय्याने माझ्या जमिनीतील कपाऊंड व बांधकाम पाडत होते. आमचे वाहन त्या ठिकाणी आलेले पाहता त्यांनी आमच्यावर दगडाने हल्ला करण्यास सुरुवात केली व त्या सर्वांच्या हातात काठ्या कु-हाडी, तलवार अशी घातक शस्त्र होती. आम्ही थेट पोलीस स्टेशनकडे निघालो. घटनेचा दबाव असल्यामुळे माझ्या पतीच्या छातीत वेदना होऊ लागल्या. त्यानंतर पतीने लगेच ग्रामीण रुग्णालय आष्टी येथे जाऊन उपचार घेतले. सदरच्या घटनेमुळे माझे लोखंडी अँगल्स डिझायन कंपाऊंड, संगमरवरी २ सिंह व माैल्यवान / डिझाइन दगड, पत्रे, पाण्याची मोटार, गॅस शेगडी व घरातील सामान १० ते १५ लाख रुपयांचे चोरून घेऊन गेले. आ. सुरेश धस, सुधीर पठाडे, रमेश वांढरे, रवींद्र पठाडे, जिया बेग, भूषण पठाडे, नितीन पोठरे, विलास भोगाडे, संभाजी भोगाडे, शिवाजी घुले यांच्यासह एकूण ३८ जण व इतर पाच जणांवर कलम १४३, १४७, १४८, १४९, ४२७, ३३६,१७९ नुसार आष्टी पोलीस ठाण्यात गुन्हा दाखल करण्यात आला आहे.