लॉकडाऊन रद्द करा; एआयएमआयएम आक्रमक

गेल्या वर्षभरापासून सर्व उद्योग, व्यवसाय तोट्यामध्ये असून, व्यावसायिक, शेतकरी, कष्टकरी, कामगार व सामान्य नागरिक निराशेच्या खाईत लोटले गेले आहेत. मागील वर्षभर थकलेले जागेचे भाडे, कर्मचाऱ्यांचे पगार व लाइट बिल भरण्यासाठी व्यावसायिकांवर आईच्या, पत्नीच्या अंगावरील सोने गहाण ठेवण्याची किंवा विकून टाकण्याची नामुष्की आली आहे. हे सर्व असताना त्यातच जिल्हा प्रशासनाने पुन्हा १५ जूनपर्यंत लॉकडाऊनचा आदेश दिला आहे. यामुळे सर्व छोटे-मोठे व्यावसायिक, रोजंदारीवर काम करून पोट भरणारे, कामगार, शेतकरी, कष्टकरी, श्रमिक यांचे हाल झाले आहेत, असे निवेदनात म्हटले आहे.

लाॅकडाऊनच्या काळात सील केलेली दुकाने उघडण्याची परवानगी द्यावी, सर्व दुकाने उघडावीत, सरसकट कोरोना लस देण्यात यावी, नियम कडक करून नियम न पाळणाऱ्यांवर कडक कारवाई करावी, अत्यावश्यक वस्तू दुकाने, किराणा, बेकरी, मांस, मटन आदी, तसेच हॉटेलला पार्सल सुविधेची परवानगी देण्यात यावी, आदी मागण्या निवेदनात नमूद केल्या आहेत. निवेदनावर जिल्हाध्यक्ष शेख शफिक यांच्यासह एजाज खन्ना, नगरसेवक शेख मतीन, नगरसेवक हाफीज अशपाक, मुफ्ती वाजेद, नईम मेंबर, सोफियान मनियार, इलियास इनामदार, नसीर, रियाज खान आदींची नावे व सह्या आहेत.