भाऊ कृपा करा, विडा केंद्राला रुग्णवाहिका द्या

येवता : केज तालुक्यातील विडा प्राथमिक आरोग्य केंद्रांतर्गत ६० हजार लोकसंख्या आहे. विड्यापासून केज २५ तर नेकनूर २० किलोमीटर आहे. मागील अनेक वर्षांपासून एक भंगार रुग्णवाहिका येथे कार्यरत आहे. त्यामुळे येथील आरोग्य अधिकाऱ्यांकडून रुग्णवाहिकेसाठी वेळोवेळी प्रयत्न केला. परंतु, त्यांच्या प्रयत्नांना यश मिळाले नाही. त्यामुळे भाऊ, तुम्हीच कृपा करा आणि विडा प्रा. आरोग्य केंद्राला एक रुग्णवाहिका द्यावी, अशी मागणी होताना दिसून येत आहे.

येथील रुग्णांवर प्रथमोपचार करून केज, नेकनूर, अंबाजोगाई येथे रेफर करण्यात येते. परंतु येथे गेल्या कित्येक वर्षांपूर्वीची एक भंगार रुग्णवाहिका कार्यरत असल्याने रुग्णांना बाहेर रेफर केल्यानंतर मोठ्या प्रमाणात अडचणी निर्माण होत आहेत. त्यामुळे येथील आरोग्य अधिकाऱ्यांनी शासन स्तरावर ीुरुग्णवाहिका देण्यासंदर्भात मागणी केली होती. परंतु, जिल्हा प्रशासनाने किंवा राजकीय नेत्यांनी याकडे गांभीर्यपूर्वक पाहिलेले नाही. त्यामुळे आतापर्यंत विडा प्रा. आरोग्य केंद्राला रुग्णवाहिका मिळालेली नाही. आरोग्य केंद्रासह जनता रुग्णवाहिकेच्या प्रतीक्षेत आहे.