अंबाजोगाई-शिरसाळा रस्त्यावरील डांबरीकरण उखडले

लोकमत न्यूज नेटवर्क

अंबाजोगाई : अंबाजोगाई-शिरसाळा रस्त्याची सध्या दुरवस्था झाली आहे. डोंगरमाथ्यातल्या नागमोडी वळण रस्त्यावरचे डांबर पूर्णपणे उखडले असून रस्ता खड्डेमय बनला आहे. अनेक ठिकाणी रस्ता खचला असून दगड, खडी रस्त्यावर पडली आहे.

पावसाच्या पाण्यामुळे रस्त्यावर दगड, धोंडे वाहून आले आहेत. यामुळे वाहने घसरुन अपघात होत आहेत. या रस्त्याचे काम तकाळ मार्गी लावण्याची मागणी वाहनधारक करीत आहेत.

अंबाजोगाई ते सिरसाळा या रस्त्याला कुरणवाडी, येल्डा, चिंचखंडी, मंगाईवाडी, ममदापूरसह डोंगरातील अनेक गावांची वर्दळ या रस्त्याला असते. या रस्त्याचे काम कित्येक महिन्यापासून संथगतीने सुरु आहे. वाहनधारकांना तारेवरची कसरत करीत वाहन चालवावे लागत आहे. याच रस्त्यावर मुकुंदराज स्वामी महाराज मंदिराच्या डोंगरात नागमोडी व वळण रस्ता हा धोकादायक असलेला घाट रस्ता आहे. नागमोडी वळण असलेल्या रस्त्याचे डांबर उखडून खड्डे पडले आहेत. रस्ता बंद असल्यामुळे नागरिकांना अंबाजोगाई बाजारपेठेत येण्यासाठी ऑटोरिक्षाने प्रवास करताना जीव मुठीत धरून प्रवास करावा लागत आहे. मालवाहतूक करणाऱ्या वाहनधारकाला नागमोडी वळण रस्ता पार करणे तारेवरची कसरत बनला आहे.

या रस्त्याचे काम औरंगाबादच्या ऐश्वर्या कंपनीकडे आहे. मात्र या कंपनीच्या वतीने रस्त्यावर अनेक गुत्तेदार काम करीत आहेत. या रस्त्याचे काम वाहनधारकांच्या सेवेसाठी नाही तर गुत्तेदाराच्या मर्जीने चालत असल्यामुळे कित्येक महिन्यांपासून या रस्त्याचे काम संथगतीने सुरु आहे. या रस्त्यावर एखाद्याचा बळी गेल्यावरच या रस्त्याचे काम पूर्ण होणार का? असा संतप्त सवाल वाहनधारक करीत आहेत. या रस्त्याच्या कामाकडे लोकप्रतिनिधी, वरिष्ठ अधिकाऱ्यांनी लक्ष घालून काम पूर्ण करावे, अशी मागणी होत आहे.

.....

या रस्त्यावरुन व नागमोडी घाटातून मालट्रकसारखे वाहने चालविणे तारेवरची कसरत बनली आहे. रस्त्यावर खड्डे पडले आहेत. दगड, गोटे रस्त्यावर वाहून आले आहेत. घाट कधी संपेल याकडे लक्ष असते. या रस्त्याचे काम लवकर मार्गी लावण्याची गरज आहे.

-दत्ता मुंडे, ममदापूर, परळी, वाहनधारक.

===Photopath===

200621\avinash mudegaonkar_img-20210618-wa0058_14.jpg