दामदुपटीचे आमिष दाखवून ९० लाखांची फसवणूक

बीड : ठेवीदार आणि गुंतवणूकदारांना दामदुप्पट आणि प्लॉटची आमिषे दाखवून बीडमध्ये विविध ग्राहकांना ९० लाखांना फसवणूक केल्याचा प्रकार समोर आला आहे. याप्रकरणी ‘ मेरीट लॅन्ड मार्क्स’ कंपनीच्या चेअरमन आणि संचालकासह चौघांविरोधात शहर पोलीस ठाण्यात गुन्हा दाखल करण्यात आला आहे.

शहरातील जालना रोडवरील लक्ष्मी संकुलातील ‘मेरीट लॅन्ड मार्क्स लि.पुणे’ यांच्या शाखेचे कार्यालय आहे. या शाखेत २०१४ ते २०१७ या कालावधीत कंपनीने ठेवीदारांना प्लॉट घेण्यासाठी कमीत कमी १ हजार रुपयांच्या पुढे मासिक, तिमाही, सहामाही, वार्षिक हप्ते भरल्यास पाच वर्षांनंतर त्याच्या दुप्पट पैसे किंवा पैसे नको असल्याचा प्लॉट तुमच्या नावाने करून दिला जाईल असे आमिष दाखविले. या स्कीमच्या आमिषाला बीडमधील अनेक जण बळी पडले असून, गुंतवणूकदारांकडून ८९ लाख ९४ हजार ४०० रुपयांच्या ठेवी जमा करून घेतल्या आहेत. मात्र, कंपनीने मुदत संपूनही गुंतवणूकदारांना पैसे अथवा प्लॉट न दिल्याने बापूसाहेब बापूराव गळगटे (रा. हरिनारायण आष्टा, ता. आष्टी) यांनी बीड शहर पोलीस ठाण्यात तक्रार दिली असून याप्रकरणी ‘मेरीट लॅन्ड मार्क्सचे’ संचालक महेश मुंगशे, सुरेश जाधव, किरण आटपालकर, महादेव साळुंके यांच्याविरोधात फसवणुकीचा गुन्हा दाखल करण्यात आला आहे. याप्रकरणाचा तपास पोलीस निरीक्षक रवी सानप हे करीत आहेत.

....

आर्थिक गुन्हे शाखेकडे वर्ग होणार गुन्हा

दामदुप्पट किंवा प्लॉटचे आमिष दाखवून जिल्ह्यातील नागरिकांची ९० लाखाला फसवणूक केली आहे. याप्रकरणी बीड शहर पोलीस ठाण्यात गुन्हा दाखल करण्यात आला आहे. तरीदेखील या प्रकरणाचा तपास आर्थिक गुन्हे शाखेकडून करण्यात येणार आहे. राज्यातील किती जिल्ह्यात अशा प्रकारे कंपनीकडून फसवणूक करण्यात आली याचा तपासदेखील होणार असल्याची सूत्रांची माहिती आहे.

...

आमिषाला बळी पडू नये

नागरिकांची यापूर्वीदेखील दामदुप्पट व इतर आमिष दाखवून फसवणूक केल्याप्रकरणी पतसंस्थांवर गुन्हे दाखल झालेले आहेत. तरीदेखील सर्वसामान्य नागरिक आमिषाला बळी पडत आहेत. त्यामुळे सर्व खात्री केल्याशिवाय पैसे गुंतवणूक करू नये. त्या कंपनीची चोहोबाजूने माहिती घेत त्यामध्ये गुंतवणूक करावी व फसवणूक टाळावी, असे आवाहन पोलीस प्रशासनाकडून वेळोवेळी करण्यात येत आहे.