ढूक, ढूक ढूक...फायरिंगसाठी प्रसिद्ध असलेली आणि तमाम भाई लोकांच्या गळ्यातील ताईत बनलेली बुलेट आता कात टाकणार आहे. बुलेट बनविणारी कंपनी रॉयल एन्फील्ड (Royal Enfield) आता इलेक्ट्रीक बाईक (Electric Bike) लाँच करणार आहे. आता हा सायलेन्सरच्या आवाजाची सोय कंपनी करणार की नाही याकडेही पाहणे औत्सुक्याचे ठरणार आहे.
काळाप्रमाणे आता पारंपरिक कंपन्याही बदलू लागल्या आहेत. अनेक मोठमोठ्या कंपन्य़ा त्यांची इलेक्ट्रीक वाहने बनवू किंवा त्यावर काम करू लागल्या आहेत. यामुळे रॉयल एन्फील्डनेही भविष्यात इलेक्ट्रीक बाईक लाँच करण्याची घोषणा केली आहे.
नुकतीच एका डिजिटल प्लॅटफॉर्मवर Royal Enfield Meteor Electric Variant ची झलक दिसली होती. या बाईकचा लूक एकदम झक्कास आहे. कंपनीने या इलेक्ट्रीक बाईकच्या मॉडेलबाबत कोणतीही माहिती दिलेली नाही. मात्र, मीटियर 350 च्या इलेक्ट्रीक व्हर्जनवरून बाजारात गरमागरम चर्चा रंगू लागल्या आहेत.
रॉयल एन्फील्ड २०२३ मध्ये आपली पहिली इलेक्ट्रिक बाइक लाँच करू शकते. ही बाईक कोणती असेल हे अद्याप माहिती नसले तरीही सध्या बाजारात असलेल्या बाईकपैकी कोणतीतरी एक बाईक इलेक्ट्रीक असणार आहे. इंडियन ऑटो ब्लॉग डॉट कॉम वर रॉयल एनफील्ड मीटियर 350 च्या डमी इलेक्ट्रीक मॉडेलची झलक दिसली आहे. ही बाईक ड्युअल टोन कलर थीममध्ये आहे. जी निळ्य़ा आणि पांढऱ्या रंगामध्ये आहे. रेट्रो डिझाईवनच्या या बाईकचे इंजिन आणि चेसिस वेगळ्या डिझाईनचे आहेत.
कशी असेल बाईक?रॉयल एन्फील्डच्या या येणाऱ्या बाईकचा फ्यूअल टँकचा वरचा हिस्सा पांढरा आणि खालचा हिस्सा निळ्य़ा रंगात असून शकतो. सोबत व्हील रिम्समध्ये ब्लॅकसोबत ब्ल्यू टच दिसू शकतो. रॉयल एन्फील्डमध्ये मोठी बॅटरी असण्याची शक्यता आहे. कारण सध्याची इंजिन क्षमता पाहता ग्राहकांना तो ताकदीचा फिल देण्यासाठी एवढ्या मोठ्या बॅटऱ्या गरजेच्या आहेत. तसेच कंपनीच्या नावासोबत EV असे लिहिलेले असू शकते. आता ग्राहक या नव्या बाईकला कशी पसंती देतात हे पाहणे औत्सुक्याचे ठरणार आहे. अद्याप दोन-तीन वर्षे असली तरीही ही धाकड बाईक नव्या पिढीच्या तरुणांना आवडण्याची शक्यता आहे.