टोयोटा 'इनोव्हा क्रिस्टा' कायमची बंद होणार? डिझेल MPV प्रेमींना मोठा धक्का; खरेदीसाठी शेवटची संधी!

Toyota Innova Crysta discontinued India 2026 : टोयोटा आपली लोकप्रिय डिझेल MPV 'इनोव्हा क्रिस्टा' बंद करण्याची शक्यता आहे. हायक्रॉसच्या वाढत्या लोकप्रियतेमुळे हा निर्णय घेतला जाऊ शकतो.

भारतीय रस्त्यांवर दशकांपासून राज्य करणारी आणि 'डिझेल किंग' म्हणून ओळखली जाणारी टोयोटा इनोव्हा क्रिस्टा आता निरोप घेण्याच्या तयारीत आहे. ऑटोमोबाईल क्षेत्रातील ताज्या अहवालानुसार, टोयोटा किर्लोस्कर मोटर या लोकप्रिय MPV चे उत्पादन लवकरच बंद करण्याची शक्यता आहे. जर तुम्हाला डिझेल इंजिन असलेली हाय-परफॉर्मन्स इनोव्हा हवी असेल, तर तुमच्याकडे ही शेवटची संधी असू शकते.

टोयोटाने गेल्या वर्षी 'इनोव्हा हायक्रॉस' लाँच केली होती, जी हायब्रिड आणि पेट्रोल पर्यायांसह उपलब्ध आहे. तेव्हापासूनच क्रिस्टाच्या भविष्याबाबत चर्चा सुरू होत्या. कंपनी आता हळूहळू डिझेल मॉडेलकडून पर्यावरणपूरक आणि आधुनिक हायब्रिड तंत्रज्ञानाकडे वळत आहे, ज्यामुळे क्रिस्टाचे उत्पादन बंद करण्याचा निर्णय घेतला जाऊ शकतो.

डिझेल इंजिनची वाढती कठीण आव्हाने
भारतातील कडक होत चाललेले उत्सर्जनाचे नियम (BS6 Phase 2 आणि पुढील टप्पे) आणि डिझेल इंजिनच्या उत्पादनाचा वाढता खर्च, यामुळे टोयोटा आपल्या पोर्टफोलिओमधून क्रिस्टा हटवू शकते. याआधीही क्रिस्टाचे बुकिंग काही काळासाठी बंद करण्यात आले होते, मात्र ग्राहकांच्या आग्रहाखातर ते पुन्हा सुरू झाले होते.

ग्राहकांसाठी काय आहे पर्याय?
जर तुम्हाला टॅक्सी व्यवसायासाठी किंवा मोठ्या कुटुंबासाठी मजबूत डिझेल गाडी हवी असेल, तर सध्या क्रिस्टा उपलब्ध आहे. मात्र, एकदा उत्पादन बंद झाल्यावर केवळ स्टॉक संपेपर्यंतच ही गाडी खरेदी करता येईल. त्यानंतर ग्राहकांना हायक्रॉस किंवा इतर पेट्रोल पर्यायांवर अवलंबून राहावे लागेल.