लोकमत न्यूज नेटवर्क
अमरावती : वर्षातील सर्वात लहान दिवस २१ डिसेंबरला १० तास ४७ मिनिटांचा राहणार आहे. या दिवशी सूर्य जास्तीत जास्त दक्षिणेकडे राहिल. या बिंदूवर सूर्य असताना दिवस हा वर्षातला सर्वात लहान व रात्र ही सर्वात मोठी असते. या दिवसात दरवर्षाला थोडा फरक पडू शकतो. पृथ्वीचा अक्ष २३.५ अंशाने कललेला असल्याने हे घडत असते व याचाच परिणाम म्हणून सूर्याचे उत्तरायन व दक्षिणायन आपल्याला अनुभवता येते. २१ डिसेंबरच्या सर्वांत लहान दिवसाला हिवाळा अयन दिवस असेसुद्धा म्हणतात . सर्व खगोलप्रेमींनी व जिज्ञासूंनी सर्वांत लहान दिवसाचे प्रत्यक्ष कालमापन करावे, असे आवाहन मराठी विज्ञान परिषदेचे विभाग अध्यक्ष प्रवीण गुल्हाने व हौशी खगोल अभ्यासक विजय गिरुळकर यांनी केले.