अमरावती : आदल्या दिवशीच मुलीला माहेरी घेऊन आले असते, तर पोरीचा जीव वाचला असता, अशा हृद्यभेदी शब्दात रूदन करत पोटच्या लेकीचे पार्थिव पाहून मातेने हंबरडा फोडला. शवागृहातील त्या मातेचा गहिवर पाहून उपस्थितांच्या डोळ्याच्या कडा देखील पाणावल्या. जिल्हा सामान्य रुग़्णालयातील शवागृहात ७ नोव्हेंबर रोजी सकाळी आठच्या सुमारास हृद्य पिळवळून टाकणारी ती घटना उघड झाली.
मुलीला तिचा पती व एका महिलेनेच विषारी द्रव्य पाजून मारून टाकल्याचा आरोप करत ते दोघेच आपल्या मुलीच्या मृत्यूला जबाबदार असल्याची तक्रार मृत विवाहितेच्या आईने ७ नोव्हेंबर रोजी दुपारी गाडगेनगर पोलीस ठाण्यात नोंदविली. त्या तक्रारीवरून पोलिसांनी आरोपी विलास विजय रामटेके व एक महिला (दोघेही रा. विलासनगर) यांच्याविरूध्द काैटुंबिक छळ तथा आत्महत्येस चिथावणी देण्याचा गुन्हा दाखल करण्यात आला.
तक्रारकत्या महिलेच्या मुलीचा आरोपी विलाससोबत प्रेमविवाह झाला होता. परंतू विलास हा तिला (पत्नीला) बेदम मारहाण करायचा. तथा विलासच्या घरातील एक महिला देखील तिचा शारीरिक मानसिक छळ करीत होती. हा सर्व प्रकार तिने आईच्या कानी घातला होता. दरम्यान ६ नोव्हेंबर रोजी पहाटे आरोपी विलासने साळीच्या मोबाईलवर कॉल करत तुम्ही तुमच्या मुलीला घेऊन जा, असे सुचविले. कामाहून परत आल्यावर जावयाचा फोन कॉल आल्याची माहिती लहान मुलीने आईला दिली.
तुमची मुलगी मरण पावली
दरम्यान, ७ नोव्हेंबर रोजी पहाटे २.०९ मिनिटांनी विलास रामटेके याने साळीच्या मोबाईलवर कॉल करत तुमची मुलगी मरण पावल्याची माहिती सासुला दिली. मी तुम्हाला घ्यायला येतो, असेही तो म्हणाला. मात्र मृताच्या आईने त्यास नकार दिला. ती सकाळी आठच्या सुमारास शवागृहात पोहोचली असता, तिला मुलीचा मृतदेहच दिसून आला. तुमच्या मुलीने विषारी द्रव्य प्राशन करून आत्महत्या केल्याची माहिती आरोपी विलासने सासुला दिली. मात्र मुलीला विलास व एका महिलेनेच आत्महत्या करण्यास चिथावणी दिल्याचा आरोप करत महिलेने दुपारी गाडगेनगर पोलीस ठाणे गाठले.