एचटीबीटी बियाण्यांची लागवडीस मनाई

अमरावती : खरीप हंगाच्या पार्श्वभूमीवर शिवारात पेरणीपूर्व मशागत सुरू आहे. शेतकऱ्यांनी खरिपासाठी बीजी-२ या शासनमान्यता बियाण्यांची लागवड करावी. याशिवाय मान्यता नसलेले कोणतेही बियाणे पेरणी करू नये. यामुळे शेताचे तसेच पर्यावरणाचे नुकसान होण्याची शक्यता आहे. पर्यावरण कायद्यानुसार अनधिकृत बियाण्यांचा वापर, साठवणूक हा कायद्यानुसार गुन्हा ठरविण्यात आलेला आहे. यासाठी एक लाकांचा दंड व पाच वर्षे कारावासाची तरतूद असल्याचे कृषी विभागाने सांगितले.

मान्यता नसलेले बनावट व बेकादेशीर एचटीबीटी बियाणे आरआर, राऊंड अप बीटी, तणावरची बीटी, विड गार्ड आदी नावाने विक्री होण्याची शक्यता आहे. असे बियाणे अधिकृत नसून अशा बियाण्यांचे उत्पादन व विक्री करण्यास शासनाची अनुमती नसल्याचे जिल्हा अधीषक कृषी अधिकारी विजय चवाळे यांनी सांगितले. अशा प्रकारच्या बियाण्यांची विक्री केल्यानंतर पावती दिली जात नाही. या बियाण्यांच्या पाकिटावर कोणत्या प्रकारचे तंत्रज्ञान तसेच कोणत्या क्षेत्रासाठी शिफारस करण्यात आलेली आहे, याचा उल्लेख नसतो. पाकिटावर मालाच्या गुणवत्तेचे विवरण दिलेले नसल्याचे चवाळे यांनी सांगितले.

अशा बियाण्यांची विक्री किंवा साठवणूक केल्यास बियाणे नियंत्रण आदेश १९८३ महाराष्ट्र कापूस बियाणे अधिनियम २००९, नियम २,०१० तसेच पर्यावरण संरक्षण कायदा १,९८६ अंतर्गत कायदेशीर कारवाई केल्या जाणार असल्याचे कृषी विभागाने सांगितले.

बॉक्स

बोलगार्ड-२ मध्ये उपलब्ध बीजी-२ ची किंमत ७३० रुपये

कपाशीचे बियाणे खरेदी करताना पक्के बिल घ्यावे, बिलात पीकाचे वाण, लॉट नंबर, वजन, अंतिम मुदत, कंपनीचे पूर्ण नाव नमूद असल्याची खात्री करून घ्यावी. कपाशी बियाणे पाकिटावरील सरकारमान्य चिन्ह तपासून घ्यावे. बियाणे उगवणीची खात्री करण्यासाठी अंतिम मुदत तपासावी. बोलगार्ड-२ मध्ये बीजी-२ च्या पाकिटाची किंमत ७३० रुपये यंदा जाहीर करण्यात आल्याचे कृषी विभागाने सांगितले.