अज्ञात वाहनाच्या धडकेत नीलगाय जागीच ठार

पोहरा बंदी : चिरोडी वर्तुळातील हातला बीट वनखंड ३१४ मध्ये चांदूर रेल्वे-अमरावती राज्य महामार्गावरील सावंगा फाटानजीक पाच वर्षीय मादी गरोदर नीलगायला वाहनाची धडक लागल्याने जागीच ठार झाल्याची घटना उघडकीस आली. याची माहिती चांदूर रेल्वे वनपरिक्षेत्र अधिकारी आशिष कोकाटे यांना मिळताच चिरोडी वर्तुळातील वनकर्मचाऱ्यांनी तडकाफडकी घटनास्थळ गाठले. मृत नीलगायची पाहणी केली असता, वाहनाची जबर धडक बसल्याचे स्पष्ट झाले. विशेषतः ही मादी नीलगाय गरोदर असल्याचे शवविच्छेदन अहवालातून पुढे आले. रस्ता ओलांडताना हा अपघात झाल्याचा कयास वनविभागाने वर्तविला. पशु वैद्यकीय अधिकारी डॉ. अलोने यांना घटनास्थळी पाचारण करण्यात आले. या नील गाईचे शवविच्छेदन करून घटनास्थळी पंचनामा करण्यात आला. यावेळी वनपरिक्षेत्र अधिकारी कोकाटे यांच्या मार्गदर्शनात चिरोडी वर्तुळ अधिकारी एस. एस. अली, वनरक्षक राजन हिवराळे, अश्विन महल्ले, राहुल कैकाडे, दीपा बेला, वनमजूर शेख रफिक, मंगल जाधव यांच्या उपस्थितीत मृत नीलगाईचा दफनविधी पर पडला.