दिव्यांगांच्या साहाय्यासाठी ‘महाशरद’ पोर्टल

अमरावती : दिव्यांगांचे जीवन जगणे सुलभ व्हावे व त्यांना सुगम्यता प्राप्त व्हावी, यासाठी विविध सहायक उपकरणांची आवश्यकता असते. त्याचवेळी समाजामध्ये दानशूर व्यक्ती, सामाजिक व सेवाभावी संघटना या दिव्यांगांना सुगम्यता प्राप्त करून देण्यासाठी आवश्यक सहायक साधनांचा पुरवठा करू इच्छितात. मात्र, या दोघांमध्ये दुवा साधला जात नसल्याने दिव्यांगांना आवश्यक असणाऱ्या साधनांची कमतरता जाणवते. हा दुवा साधण्यासाठी शासनाने ‘महाशरद’ नावाने वेब पोर्टल कार्यान्वित केले आहे.

दिव्यांगाना सुविधांसाठी शरद (सिस्टीम फॉर हेल्थ अँड रिहॅबिलेटेशन असिस्टन्स फॉर दिव्यांग) हे अभियान १२ डिसेंबरपासून सुरू करण्यात आले आहे. त्यानुसार कार्यान्वित पोर्टलवर दिव्यांग व्यक्तींना तसेच दिव्यांग व्यक्तींना सहाय्य करु इच्छिणाऱ्या व्यक्ती व संघटनांना नोंदणी करण्याचे आवाहन जिल्हा प्रशासनाकडून करण्यात आले आहे. दिव्यांगांना त्यांचे जीवन जगणे सुलभ व्हावे व त्यांना सुगम्यता प्राप्त व्हावी, यासाठी विविध सहायक उपकरणांची आवश्यकता असते. त्यांना त्यांच्या दिव्यांगत्वावर मात करण्यासाठी कोणत्या उपकरणांची आवश्यकता आहे, हे जाणून घेण्यासाठी, आवश्यक ती वैद्यकीय चाचणी करून घेणे व त्याआधारे सहायक उपकरणे निश्चित करणे आवश्यक आहे. असे केल्यानंतरही मर्यादित साधनसंपत्तीअभावी त्यांची पूर्तता करणे शक्य होत नाही. त्याचवेळी समाजामध्ये दानशूर व्यक्ती, सामाजिक व सेवाभावी संघटना या दिव्यांगांना सुगम्यता प्राप्त करून देण्यासाठी आवश्यक सहायक साधनांचा पुरवठा करू इच्छितात. मात्र, या दोघांमध्ये दुवा साधला जात नाही. हा दुवा साधण्यासाठी एक विश्वासाधारित व्यासपीठ निर्माण करण्यासाठी हे पोर्टल सुरु केले आहे. पुण्याचे दिव्यांग कल्याण आयुक्त व महाराष्ट्र राज्य दिव्यांग वित्त व विकास महामंडळ (मुंबई) हे संयुक्तपणे हे अभियान राबवतील.

बॉक्स

दुवा साधण्यासाठी व्यासपीठ

जनगणनेवेळी दिव्यांगत्वाच्या सहा प्रकारांची तरतूद होती. २०१६ च्या कायद्यात २१ प्रकारांची तरतूद केल्याने त्यानुसार अद्ययावत माहिती उपलब्ध करुन घेणे आवश्यक होते. दिव्यांग व्यक्तींमध्ये जनजागृती करून माहिती उपलब्ध करण्यासाठी व या दिव्यांगांना दानशूर व्यक्ती, सामाजिक व सेवाभावी संघटना यांच्याकडून मदत मिळवून देणे व या दोहोंमध्ये दुवा साधण्यासाठी एक व्यासपीठ निर्माण व्हावे म्हणून पोर्टलद्वारे अभियान राबविण्यात येणार आहे.

बॉक्स

एक वषाच्या कालावधीसाठी अभियान

पोर्टलच्या माध्यमातून उपलब्ध करून दिलेले व्यासपीठ हे विश्वास आधारित (ट्रस्ट बेस्ड) असून, नोंदणी करणाऱ्या दिव्यांग व्यक्तींना सहाय्य करण्यासाठी दिव्यांग व्यक्ती व दानशूर व्यक्ती हे दोघेही या व्यासपीठाच्या माध्यमातून एकमेकांशी संपर्क साधू शकतील. हे अभियान एक वर्षाच्या कालावधीचे असेल. यात सहभागी होण्यासाठी लाभार्थी हा महाराष्ट्राचा रहिवासी असावा व राज्यातील दिव्यांगांसाठी असलेल्या सोयीसवलतीचा लाभ घेण्यास पात्र असावा.