‘बारूद गँग’च्या संपत्तीची चौकशी करा

आधी ‘बारूद गँग’ आणि नंतर ‘आरडीएक्स’ च्या नावाने दहशत पसरविण्यासह तालुक्यात वाळू तस्करी आणि इतर अवैध धंदे करणाऱ्या गुंडांनी जमविलेल्या संपत्तीची चौकशी व्हावी,

‘बारूद गँग’च्या संपत्तीची चौकशी करा
जनतेची मागणी : मंडळ अधिकारी, तहसीलदारांवर रोष कायमच
अमरावती /अचलपूर : आधी ‘बारूद गँग’ आणि नंतर ‘आरडीएक्स’ च्या नावाने दहशत पसरविण्यासह तालुक्यात वाळू तस्करी आणि इतर अवैध धंदे करणाऱ्या गुंडांनी जमविलेल्या संपत्तीची चौकशी व्हावी, अशी मागणी पुढे येत आहे. हातमजुरी करणाऱ्या वडिलांच्या मुलांकडे ट्रक, ट्रॅक्टर आणि दुचाकी व इतर संपत्ती आली कोठून? याचा तपास झाल्यास अनेक महत्त्वपूर्ण तथ्ये उघड होऊ शकतात.
अचलपूर तालुक्यात खुलेआम सुरू असलेल्या रेती तस्करीबाबत विविध संघटनांनी लेखी तक्रारी महसूल विभागाकडे केल्या होत्या. पोलिसांनाही सगळा प्रकार माहित होता. तरीही रेती तस्करांवर कोणतीच कारवाई झाली नाही. शेवटी रेती तस्करांना विरोध करणाऱ्या अमित बटाऊवाले या तरूणाला नाहक जीव गमवावा लागला. त्यामुळे याप्रकरणासाठी खऱ्या अर्थाने दोषी असलेल्या मंडळ अधिकारी व तहसीलदारांवर कारवाई व्हायला हवी, असा जनतेचा सूर आहे. या दोघांवरही सदोष मनुष्यवधाचा गुन्हा का नोंदविला जाऊ नये, असा उघड सवाल लोक विचारत आहेत.
मंडळ अधिकाऱ्याकडे रेती तस्करांच्या वाढत्या त्रासाबद्दल वारंवार मृत अमितच्या आईने तक्रारी केल्या होत्या. मात्र, तरीही त्याकडे दुर्लक्ष झाले. त्यामुळेच बारूद गँगने अमितचा ‘गेम’ केला. तहसीलदार आणि मंडळ अधिकाऱ्यांनी त्याचवेळी तक्रारीची दखल घेतली असती तर अमितचा जीव वाचू शकला असता, असा खेद आजही अचलपूरची जनता व्यक्त करीत आहे. उपविभागीय कार्यालय अचलपुरात असताना संबंधित अधिकाऱ्यांना या वाळू माफियांच्या कारवायांची दखल घ्यावीशी वाटू नये, याबाबत आश्चर्य व्यक्त केले जात आहे व या अनुषंगाने कारवाईची मागणी केली जात आहे.

पाच आरोपी फरारच
नगरसेवक मो. शाकीर हुसैन गुल हुसैन, रायुकाँ शहराध्यक्ष आबिद हुसैन, मो. शारिक अ. रहेमान, अन्वरखाँ नियामतखाँ, अशरतखाँ मुजफ्फरखाँ, मो. वाजीद अ. रहेमान, अशरफखाँ मुजफ्फर खाँ, मतीन खाँ या आरोपींना अमित बटाऊवाले हत्याकांड प्रकरणी अटक करण्यात आली आहे तर माजीद, पप्पू पठाण, जिशान अली शुटर आणि लकी या फरार आरोपींचा शोध सुरू आहे.

जुळ्या नगरीत ‘लोकमत’चे सामूहिक वाचन
अमित बटाऊवाले हत्याकांडातील सत्यासत्यता पडताळून याप्रकरणाचा पाठपुरावा ‘लोकमत’द्वारे केला जात आहे. त्यामुळे ‘बारूद गँग’च्या कारवायांना कंटाळलेल्या जुळ्या नगरीतील नागरिकांनी सोमवारी ‘लोकमत’चे सामूहिक वाचन केले. दररोज पहाट होताच लोक ‘लोकमत’ची प्रतीक्षा करीत आहेत. सोमवारी काही लोकांनी परतवाड्याहून तर कुणी अमरावतीहून ‘लोकमत’ मागविला. एवढे करूनही अनेकांना ‘लोकमत’चा अंक मिळू शकला नाही.

रेती तस्करीबाबत तक्रारी येताच तहसीलदार व मंडळ अधिकाऱ्यांनी तातडीने कारवाया केल्याचे रेकार्डवर नमूद आहे. रेती तस्करांवर कारवाई करणे, हे महसूल विभागाचे काम आहे. तक्रारकर्त्याला संरक्षण देणे ही आमची जबाबदारी नाही. -श्यामकांत मस्के, उपविभागीय अधिकारी, अचलपूर.