आयपीएसने धारणी सोडताच अवैध धंदेवाले निघाले बाहेर!

नव्या ठाणेदारांकडे लक्ष : रेती, दारू तस्करी रोखण्याचे आव्हान

धारणी : तीन महिन्यांआधी परीविक्षाधीन आयपीएस निकेतन कदम यांनी धारणी पोलीस ठाण्याचा प्रभार सांभाळताच अवैध धंदेवाईक भूमिगत झाले होते. शहरासह तालुक्यातील मोठ्या गावात सुरू असलेल्या वरली मटका, गांजा व्यवसाय आणि अवैध दारूविक्रीवर त्यांनी अंकुश राखला होता. मात्र, त्यांची नियमित नियुक्तीवर बदली होताच अवैध धंदेवाईक बाहेर निघाल्याचे चित्र आहे.

धारणी शहरासह परिसरातील हरिसाल, बैरागड, सुसर्दा, सावलीखेडा, डाबका, बिजुधावडी, कळमखार यांसारख्या मोठ्या गावांत आता अवैध धंदे हळूहळू पाय पसरू लागले आहेत. अवैध धंद्यांमध्ये सर्वात जास्त वरली मटका, गांजा विक्री, अवैध दारूविक्री आणि गुटखा यांचा समावेश आहे. मेळघाटातील आदिवासी जनतेला व्यसनाच्या आधीन ठेवून त्यांची आर्थिक लूट या माध्यमातून अवैध व्यावसायिक करीत असतात. मात्र, मागील तीन महिन्यांत सर्व अवैध धंदे बंद पडल्यागत झाल्यामुळे गृहिणींना दिलासा मिळाला होता. तालुक्यातील अवैध धंदे कुठे आणि कोण करतो, याची संपूर्ण माहिती पोलिसांकडे असताना त्याकडे सोईस्कर दुर्लक्ष केले जाते, हा इथला रिवाज. तो कदम यांनी मोडला होता. आता नव्या ठाणेदारांच्या कार्यप्रणालीकडे धारणी तालुकावासीयांचे लक्ष लागले आहे.

कोट

शहर व ग्रामीण परिसरातील अवैध धंद्यांवर पोलिसांची करडी नजर आहे. कुठेही अवैध धंदे आढळून आल्यास संबंधितांविरुद्ध कडक कारवाई करण्यात येईल.

- संजय काळे, उपविभागीय पोलीस अधिकारी, धारणी