कुत्र्याच्या हल्ल्यात हरिण दगावले, दोन गंभीर जखमी

कठोरा मार्गावरील फार्महाऊसमधील घटना, पोलीस, वनविभागाची चमू पोहोचली

अमरावती : पाणी, चाऱ्याच्या शोधात असलेल्या हरणांच्या कळपावर कुत्र्यांनी केलेल्या हल्ल्यात एक हरिण दगावले, तर दोन गंभीर जखमी झाल्याची घटना कठोरा मार्गावर एका फार्महाऊसमध्ये रविवारी सकाळी ७ वाजताच्या सुमारास निदर्शनास आली. घटनास्थळी वनविभाग आणि पोलिसांची चमू दाखल झाली होती. जखमी हरणांवर वडाळी येथे उपचार करण्यात येत आहेत.

प्रत्यक्षदर्शींच्या माहितीनुसार, कठोरा मार्गावर लुंगे लॉनच्या मागे असलेल्या भामकर फार्महाऊसमध्ये हरिणांचे कळप शिरले. यादरम्यान येथील कुत्र्यांनी हरिणांवर जोरदार हल्ला चढविला. यात एका हरणाचे लचके तोडल्याने ते जागीच ठार झाले, तर दोन हरीण गंभीर जखमी झाले आहे. पहाटे भ्रमंतीला असलेल्या काही नागरिकांच्या हा प्रकार लक्षात येताच त्यांनी फार्महाऊसच्या दिशेने धाव घेतली. त्यांनी कुत्र्यांना हाकलून लावले. कसेबसे दोन जखमी हरणांना कुत्र्यांच्या तावडीतून साेडविले. नागरिकांनी हा प्रकार गाडगेनगर पोलीस आणि वनविभागाच्या लक्षात आणून दिला. त्यानंतर वनविभागाचे रेस्क्यू पथकही घटनास्थळी दाखल झाले. फॉर्म हाऊसच्या तारेच्या कुंपणात हरणांचे कळप अडकल्याने कुत्र्यांना हल्ला करता आला, अशी माहिती आहे. कुत्र्यांनी हल्ला करण्यापूर्वीच काही हरिण बाहेर पडले, हे विशेष. नागरिकांनी जखमी हरणांना पाणी पाजून सुरक्षित ठिकाणी हलविले. त्यानंतर वनविभागाच्या पथकाकडे सुपूर्द केले.

------------

कुत्र्यांच्या हल्ल्यात दोन हरीण जखमी झाले आहेत. त्यांना सलाईन लावण्यात आले आहे. ते सुद्धा गंभीर आहे. पशु वैद्यकीय अधिकारी उपचार करीत आहेत.

- अमोल गावनेर, रेस्क्यू पथक, वनविभाग.