अमरावती: संत गाडगेबाबा अमरावती विद्यापीठाचा ३७ वा दीक्षांत सोहळा २१ फेब्रुवारी राेजी सकाळी ११ वााजता ऑनलाईन आयोजित करण्यात येणार आहे. या सोहळ्याला राज्यपाल भगतसिंह कोश्यारी हे राजभवनातून ऑनलाईन, तर केंद्रीय भूपृष्ठ वाहतूक मंत्री नितीन गडकरी हे प्रत्यक्ष उपस्थित राहतील, अशी माहिती आहे.
विद्यापीठाच्या के. व्ही. देशमुख सभागृहात दीक्षांत सोहळ्याचे आयोजन करण्यात येणार आहे. मंचावर प्रमुख पाहुण्यांसह कुलगुरू मुरलीधर चांदेकर, प्र-कुलगुरू राजेश जयपूरकर, कुलसचिव तुषार देशमुख, परीक्षा व मू्ल्यांकन मंडळाचे संचालक हेमंत देशमुख, वित्त व लेखाधिकारी भारत कऱ्हाड, अधिष्ठाता एफ.सी. रघुवंशी, अविनाश मोहरील, वैशाली गुडधे, एस.व्ही. डुडुल यांच्यासह व्यवस्थापन परिषदेचे सर्व सदस्य उपस्थित राहणार आहे. मंचावर कोरोना नियमावलींचे पालन करून आसनव्यवस्थेचा आढावा कुलगुरू चांदेकर यांनी सोमवारी घेतला. मंचावर २० अथवा २३ खुर्च्या असतील, अशी तयारी केली जात आहे. राज्य शासनाने २८ फेब्रुवारीपर्यंत लॉकडाऊन वाढविल्याने जिल्हाधिकारी कार्यालयातून दीक्षांत सोहळ्याच्या अनुषंगाने मार्गदर्शक तत्त्वे मागविली जाणार आहेत. दीक्षांत सोहळ्यात गर्दी होणार नाही, याची पुरेपूर काळजी घेण्यात येत आहे. पीएच.डी.धारक, पदवी, पुरस्कारप्राप्त गुणवंत असे सुमारे ७५ विद्यार्थ्यांना सन्मानित केले जाणार आहे. सभागृहात दीक्षांत सोहळ्याच्या पत्रिकेशिवाय प्रवेश असणार नाही, असे स्पष्ट करण्यात आले आहे.