अमरावती : गस्तीवर असलेल्या शहर गुन्हे शाखेच्या पथकाला बडनेरा ते यवतमाळ मार्गावर अवैध गांजाची वाहतूक होत असल्याची माहिती मिळाली. पोलिसांनी नाकाबंदी करून गुरुवारी रात्री कारची झडती घेतली असता, एक लाख ३५ हजार रुपये किमतीचा साडेतेरा किला गांजा व चार लाखांची कार असा एकूण पाच लाख ३५ हजारांचा मुद्देमाल जप्त केला. याप्रकरणी पोलिसांनी तीन आरोपींना अटक केली. ही कारवाई बडनेरा- यवतमाळ मार्गावरील न्यू बालाजी हॉटेलजवळ नाकाबंदी लावून करण्यात आली. सदर कार यवतमाळकडून बडनेरा येथे येत होती.
सतीश दौलतराव नांदूरकर(५५, रा. देशमुख लॉन टॉवर लाईन अमरावती), गजानन रमेशराव मानकर (३२, रा. साने गुरुजीनगर ३ अमरावती), प्रशांत यादवराव रुद्रकार (३३, रा. मदना ता. नरखेड जि. नागपूर ह. मु. साईनगर अमरावती) असे आरोपीचे नाव आहे. एमएच ४९ एफ ०८९८ ही चार लाखांची कार पोलिसांनी जप्त केली. सदर आरोपीला पोलिसांनी गांजाबाबत विचारपूस केली असता गांजाचा माल सलीम मिर्झा (रा. पठाण चौक अमरावती) याचा असल्याचे त्यांनी पोलिसांना सांगितले. पुढील कारवाईसाठी आरोपीला बडनेरा पोलिसांच्या ताब्यात देण्यात आले. ही कारवाई पोलीस आयुक्त आरती सिंह यांच्या मार्गदर्शनात शहर गुन्हे शाखेचे पोलीस निरीक्षक कैलास पुंडकर व त्यांच्या पथकाने केली.