जिल्हा परिषदेच्या सभेत गाजणार शिक्षकांची आंतरजिल्हा बदली!

आज सर्वसाधारण सभा; योजनांचे पडसाद.

अकोला : जिल्हा परिषदेची सर्वसाधारण सभा बुधवार, १७ जून रोजी दुपारी १ वाजता आयोजित करण्यात आली आहे. या सभेत शिक्षकांच्या आंतरजिल्हा परिषदेच्या प्रकरणासोबतच लाभार्थी योजना राबविण्यात आलेल्या अपयशाचे पडसाद उमटण्याची शक्यता आहे. अकोला जिल्हा परिषदेअंतर्गत इतर जिल्ह्यातून आलेल्या २३५ शिक्षकांना रुजू करून घेण्यात आले आहे. आंतररजिल्हा बदलीच्या या प्रकरणांमध्ये सर्व नियम गुंडाळून ठेवत शिक्षकांना रुजू करून घेताना जिल्ह्यातील शिक्षकांच्या एकूण संख्येचाही विचार झाला नाही. शिक्षकांच्या आंतरजिल्हा बदलीतील घोळाचा मुद्दा थेट ग्रामविकास मंत्र्यांच्या दालनात पोहोचला होता. त्यांनी सहसचिव आणि मुख्य कार्यकारी अधिकार्‍यांना अहवाल सादर करण्याचे आदेशही दिले होते. आता जिल्हा परिषद अधिकार्‍यांच्या या मनमानीचा पाढा बुधवारी होत असलेल्या सर्वसाधारण सभेत पुन्हा वाचल्या जाण्याची शक्यता आहे. याशिवाय या सभेत जिल्हा परिषदेच्या सेस फंडातून राबविण्यात येणार्‍या योजनांच्या अपयशाचे पडसादही उमटण्याची शक्यता आहे. पाणीटंचाईच्या काळात करण्यात आलेल्या उपाययोजनांवरही ही सभा गाजण्याची शक्यता आहे.