यंदाही सव्वाशेच्यावर शिक्षक अतिरिक्त!

संचमान्यता दुरुस्तीची प्रतीक्षा: लवकरच समायोजनेची प्रक्रिया

लोकमत न्यूज नेटवर्क
अकोला: माध्यमिक शिक्षण विभागाने अतिरिक्त ठरणाऱ्या शिक्षकांची माहिती जिल्ह्यातील शाळांना मागितली असून, शाळांनी ही माहिती शिक्षण विभागाकडे पाठविली आहे. अद्याप काही शाळांची माहिती यायची आहे. गतवर्षीप्रमाणे यंदाही अतिरिक्त ठरणाऱ्या शिक्षकांच्या समायोजनाची आॅनलाइन पद्धतीने प्रक्रिया राबविण्यात येणार आहे. यंदा जिल्ह्यात सव्वाशेच्या वर शिक्षक अतिरिक्त ठरण्याची शक्यता शिक्षण विभागाने व्यक्त केली आहे. शाळांची संचमान्यता दुरुस्ती झाल्यानंतर अतिरिक्त शिक्षकांच्या समायोजनाची प्रक्रिया राबविण्यात येणार आहे.
गतवर्षी जिल्ह्यामध्ये ११७ शिक्षक अतिरिक्त ठरले होते. यातील काही शिक्षक वगळता, उर्वरित शिक्षकांचे रिक्त जागा असलेल्या शाळांवर समायोजन करण्यात आले होते. यावर्षीसुद्धा माध्यमिक शिक्षण विभागाने जिल्ह्यातील शाळांकडून शिक्षकांची पदसंख्या, आरक्षण, रिक्त पदे याची माहिती मागविण्यात आली असून, अनेक शाळांनी अद्यापपर्यंत ही माहिती शिक्षण विभागाकडे पाठविली नसल्याचे समोर आले आहे. जिल्ह्यातील जवळपास ८२ शाळांनी त्यांच्या संचमान्यतेसंबंधीचे प्रस्ताव शिक्षण विभागाकडे पाठविले आहेत. संचमान्यतेच्या प्रस्तावामध्ये काही त्रृटी असून, त्या दुरुस्त केल्यानंतरच शिक्षकांच्या समायोजनाची प्रक्रिया राबविण्यात येणार आहे. जिल्ह्यातील माध्यमिक शाळांमध्ये यावर्षी १२५ च्यावर शिक्षक अतिरिक्त ठरण्याची शक्यता आहे.
तसेच शाळांमधील ७0 ते ८0 जागा रिक्त असणार असून, या जागांवर अतिरिक्त शिक्षकांचे समायोजन करण्यात येईल. २५ मे रोजी पुणे येथे संचमान्यता दुरुस्ती शिबिर होणार आहे. या शिबिरामध्ये अनेक शाळांच्या संचमान्यतेचे प्रस्ताव दुरुस्त करण्यात येतील.

अतिरिक्त ठरण्याची शिक्षकांना भीती
२0१६ व १७ ची नवीन संचमान्यतेची प्रक्रिया राबविण्यात येत असून, या प्रक्रियेदरम्यान शाळांमध्ये अतिरिक्त ठरणाऱ्या शिक्षकांची आॅनलाइन माहिती मागविण्यात येणार आहे. त्यांची प्रतीक्षा यादी सेवाज्येष्ठतेनुसार तयार करण्यात येणार आहे. त्यामुळे यंदाच्या यादीत अतिरिक्त शिक्षक म्हणून आपला नंबर लागतो की काय, अशी भीती शिक्षकांना वाटत आहे.

गतवर्षी अतिरिक्त ठरलेल्या शिक्षकांना समायोजनाची प्रतीक्षा
गतवर्षी जिल्ह्यात ११७ शिक्षक अतिरिक्त ठरले होते. यातील सात शिक्षकांचे समायोजन झाले नाही. त्यामुळे त्यांना मूळ शाळेत पाठवून त्यांचे वेतन काढण्यात येत आहे. यंदाच्या शिक्षक समायोजन प्रक्रियेदरम्यान आम्हा अतिरिक्त शिक्षकांचे शाळांमध्ये समायोजन करावे, अशी मागणी या शिक्षकांनी केली आहे.

संचमान्यता दुरुस्त झाल्यानंतर शिक्षक समायोजनाची प्रक्रिया सुरू होईल. गतवर्षीप्रमाणे यंदाही जिल्ह्यात १२५ च्यावर शिक्षक अतिरिक्त ठरण्याची शक्यता आहे. या शिक्षकांच्या समायोजनाची प्रक्रिया पूर्ण करण्यात येईल.
- प्रकाश मुकुंद, शिक्षणाधिकारी