जिल्ह्यात बदलून आलेल्या पोलीस निरीक्षकांना चांगल्या ‘पोस्टिंगची’ प्रतीक्षा

शहरातील ठाण्यात रिक्त पद.

अकोला: अनेक वर्ष बाहेरगावी राहून अखेर अकोल्यात बदलीवर आलेल्या काही पोलीस निरीक्षकांना चांगल्या पोस्टिंगची प्रतीक्षा आहे. शहरातील स्थानिक गुन्हे शाखा, सिव्हिल लाइन पोलीस ठाणे, डाबकी रोड पोलीस ठाणे, आकोट फैल पोलीस ठाण्यांमधील पोलीस निरीक्षकांच्या बदल्या झाल्याने या ठाण्यांमधील पदे रिक्त आहेत. त्यामुळे बदलीवर आलेले पोलीस निरीक्षक चांगल्या पोलीस ठाण्यात आपली वर्णी लागावी यासाठी प्रयत्नरत आहेत. काही दिवसांपूर्वीच नागपूर येथून पोलीस निरीक्षक सुभाष माकोडे, अनिल जुमडे, भास्कर तंवर यांची अकोल्यात बदली झाली. तीन पोलीस निरीक्षकांना पोलीस अधीक्षकांनी अद्यापपर्यंत कोणतीही जबाबदारी दिलेली नाही. या तीनही अधिकार्‍यांना अकोल्यात काम केल्याचा दीर्घ अनुभव आहे. पोलीस निरीक्षक सुभाष माकोडे हे एलसीबीचे प्रमुख होते. यासोबतच आकोटच्या ठाणेदार पदाची जबाबदारी त्यांनी सांभाळली. भास्कर तंवर यांनी जुने शहर पोलीस ठाणे, आकोटचे ठाणेदार म्हणून अनेक वर्ष काम केले. अनिल जुमडे यांनीसुद्धा रेल्वे पोलीस ठाण्याचे प्रमुख म्हणून काम पाहिले आहे. तसेच शहरातील पोलीस ठाण्यांमध्ये काम करण्याचा अनुभवही त्यांना आहे. त्यांना अकोल्यातील गुन्हेगारीची इत्थंभूत माहिती आहे. सध्या शहरातील स्थानिक गुन्हे शाखेसह सिव्हिल लाइन पोलीस ठाणे, आकोट फैल, डाबकी रोड पोलीस ठाण्यांमधील पदे रिक्त आहेत. सिव्हिल लाइनचे ठाणेदार डी.डी. ढाकणे यांची बुलडाणा येथे, डाबकी रोडचे ठाणेदार भारत रक्षाकर यांची पदोन्नतीवर पोलीस उपअधीक्षकपदी औरंगाबाद येथे, आकोट फैलचे प्रकाश निंघोट यांची नियंत्रण कक्षात बदली झाल्याने ही पदे रिक्त झाली आहे. स्थानिक गुन्हे शाखा आणि तीनही पोलीस ठाणे महत्त्वाची असल्याने, या तिघांपैकी कोणाची वर्णी लागते, याकडे पोलीस खात्याचे लक्ष आहे. चांगल्या पोलीस ठाण्यात आपली वर्णी लागावी यासाठी तिघेही पोलीस अधिकारी प्रयत्न असल्याचे समजते.