शिक्षकांच्या सेवा ज्येष्ठता यादीवरून ‘अर्थ’कारण

मनपाच्या शिक्षण विभागाचा कारभार ढेपाळला.

अकोला : शिक्षण विभागाने मनमानीरीत्या शाळा समायोजनाचा निर्णय घेतल्यानंतर आता शिक्षकांच्या सेवा ज्येष्ठता यादीला मंजुरी देण्याचे प्रयत्न चालविले आहेत. याकरिता काही शिक्षक संघटनांसोबत अर्थपूर्ण बोलणी सुरू असल्याची माहिती उजेडात आली आहे. महापालिकेच्या शाळेत गोरगरीब कुटुंबातील विद्यार्थी शिक्षणाचे धडे गिरवतात. मनपाच्या पंधरा वर्षांंच्या क ालावधीत विद्यार्थी संख्या टिकवण्याचे शिक्षण विभागाने कवडीचेही प्रयत्न न केल्यामुळे पटसंख्येचा आलेख दिवसेंदिवस घसरला. सन २00६-0७ मध्ये मनपाच्या ७४ पैकी १९ शाळांचे समायोजन केल्यानंतरही शिक्षण विभागाला जाग आली नाही. खासगी कॉन्व्हेंटच्या तुलनेत मनपा शाळेतील शिक्षणाचा दर्जा, मूलभूत सुविधा सुमार असल्याचा आरोप करीत पालकांनी मनपा शाळांकडे पाठ फिरवली. शिक्षण विभागाचे कामकाज प्रामाणिकपणे चालविण्याचा डंका वाजविणार्‍या शिक्षणाधिकारी शाहीन सुलताना यांच्या कार्यकाळात पुन्हा एकदा ५५ शाळेपैकी २१ शाळांचे समायोजन करण्याचा निर्णय घेण्यात आला. पटसंख्या कमी झाल्याची सबब पुढे करीत आयुक्त सोमनाथ शेटे यांनी नियमबाह्यरीत्या शाळा समायोजनाचा निर्णय घेतला. अर्थातच, आगामी काही दिवसांत अतिरिक्त शिक्षकांची ह्यशाळाह्ण भरवून खिसे जड करण्याचे उद्योग जोराने सुरू होणार आहेत. यादरम्यान, शिक्षकांच्या सेवा ज्येष्ठता यादीला मंजुरी देण्यापूर्वीच अर्थकारणाला वेग आला आहे. शाळांचे समायोजन केले, त्याचवेळी उच्च शिक्षित मुख्याध्यापक-शिक्षकांच्या नेमणुकीची व सेवा ज्येष्ठतेची प्रक्रिया पूर्ण करणे अपेक्षित होते. शालेय सत्र सुरू होण्याला अवघा आठवडाभराचा कालावधी असताना शिक्षण विभागाने सेवा ज्येष्ठतेचे घोडे दामटविण्याचा प्रयत्न सुरू केला आहे. शिक्षणाधिकारी शाहीन सुलताना यांच्या कार्यशैलीवर उर्दू शिक्षक संघटनेसह इतर संघटनांची तीव्र नाराजी आहे. काही शिक्षकांनी या मुद्यावर शिक्षणाधिकार्‍यांना घेरण्याची तयारी चालविली आहे. यासंदर्भात शिक्षणाधिकारी शाहीन सुलताना यांना संपर्क साधण्याचा प्रयत्न केला असता, त्या उपलब्ध होऊ शकल्या नाहीत.