अपघातग्रस्त शिक्षकांचे प्राण वाचविण्यासाठी शिक्षकांचा पुढाकार

पातूर : पंचायत समिती पातूरमधील जि. प. प्राथमिक शाळा विवरा क्रमांक २ येथील कार्यरत शिक्षक जे. डी. शिरसाट यांचा गत आठवड्यात अपघात झाला होता. त्यांच्या उपचारासाठी लागणारी रक्कम जमा करण्यासाठी शिक्षकांनी पुढाकार घेतला आहे.

शिक्षक शिरसाट यांच्या डोक्याला जबर मार लागल्यामुळे त्यांना अकोला येथे खासगी रुग्णालयात भरती करण्यात आले आहे. त्यांच्या मेंदूवर शस्त्रक्रिया करण्यात आली. आता त्यांच्या हात, पाय, बरगड्या यावर शस्त्रक्रिया करण्यात येणार आहे. डॉक्टरांच्या सांगण्यानुसार उपचार व शस्त्रक्रियेसाठी मोठा खर्च अपेक्षित आहे. त्यामुळे सामाजिक बांधीलकीतून शिक्षक शशिकांत गायकवाड, अ. म. वानखडे, शंकरराव तायडे, शैलेंद्र गवई, धीरज खंडारे, श्रीकांत वानखडे यांनी मदतीचे आवाहन केले होते. त्यानुसार सामाजिक बांधीलकी जपत शिक्षकांनी एकत्र येऊन मदतीचा हात पुढे करून शिरसाट यांच्या उपचारासाठी सढळ हातांनी निधी उभारला आहे.

फोटाे: मेल फोटोत

१६३ शिक्षकांनी उभारले दीड लाख

शिक्षक जे. डी. शिरसाट यांच्या उपचारासाठी आतापर्यंत १६३ शिक्षकांनी १ लाख ५० हजार १०० रुपयांपैकी काही रक्कम रोख स्वरूपात तर काहींनी ऑनलाईन पद्धतीने त्यांच्या खात्यात जमा केली. पुढील दोन-तीन दिवसांत आणखी रक्कम गोळा करण्यात येणार आहे.

शिक्षक पतसंस्थेकडून एक लाखाची मदत

पतसंस्थेचे संचालक शशिकांत गायकवाड यांनी पतसंस्थेकडून अपघात निधी म्हणून एक लाख रुपये मदत करण्याचे सुचविले असता, पतसंस्थेने त्वरित एक लाख रुपयांचा धनादेश शिक्षक शिरसाट यांच्या नातेवाईकांच्या सुपूर्द करून सामाजिक बांधिलकी जपली.

शिक्षक शिरसाट यांच्या पत्नी ज्योती जनार्दन शिरसाट, सामाजिक कार्यकर्ते हरिभाऊ इंगोले, ॲड. नीलेश शिरसाट यांच्याकडे रक्कम प्रदान केली. यावेळी डॉ. बाबासाहेब आंबेडकर जि .प. मा. कर्मचारी सहकारी पतसंस्थेचे पदाधिकाऱ्यांसह पुरुषोत्तम मंडासे, प्रशांत सिरसाट, राजकुमार वानखडे, अशोक शिरसाट उपस्थित होते.