काँग्रेस नगरसेविकेच्या विरोधात पोलीस तक्रार

निवडणूक आयोगाचे निर्देश; मनपाचा निर्णय.

अकोला : प्रभाग क्र. १३ मधील काँग्रेसच्या नगरसेविका जैनबबी शेख इब्राहिम यांनी मनपाच्या सार्वत्रिक निवडणुकीत शपथपत्रात सादर केलेली माहिती चुकीची असल्याने त्यांच्याविरुद्ध प्रशासनाने फौजदारी स्वरूपाची तक्रार सीटी कोतवाली पोलीस ठाण्यात नोंदवली. गुरुवारी आयुक्त सोमनाथ शेटे यांच्या आदेशावरून प्रभारी उपायुक्त चंद्रशेखर गुल्हाने यांनी तक्रार दाखल केली. राज्य निवडणूक आयोगाने तंबी दिल्यानंतर प्रशासनाने कारवाईचा निर्णय घेतला. प्रभाग क्र. १३ मधील काँग्रेसच्या नगरसेविका जैनबबी शेख इब्राहिम यांनी निवडणूक शपथपत्रात खोटी माहिती सादर केल्याप्रकरणी युसूफ सुकीवाले यांनी राज्य निवडणूक आयोगाकडे तक्रार केली होती. यासंदर्भात नगरसेविकेविरुद्ध कारवाई करण्याचे निर्देश निवडणूक आयोगाने एकदा नव्हे, तर तब्बल पाच वेळा दिले. पाचव्यांदा पाठविलेल्या पत्रात २५ मेपर्यंंत कारवाईचा अहवाल निवडणूक विभागाला सादर करण्याचे निर्देश असताना, मनपाने ३ जूनपर्यंंत अहवालच पाठवला नाही. यादरम्यान, निवडणूक आयोगाने आयुक्त शेटे यांना पुन्हा पत्र पाठवले. यामध्ये १६ जून रोजी निवडणूक आयोगाकडे जातीने उपस्थित राहून कारवाईचा अहवाल सादर करण्याची तंबी दिली. या पत्रानंतर मात्र आयुक्तांनी तडकाफडकी निर्णय घेत, नगरसेविका जैनबबी शेख इब्राहिम यांच्या विरोधात फौजदारी तक्रार दाखल करण्याचे आदेश उपायुक्त चंद्रशेखर गुल्हाने यांना दिल्यानंतर सीटी कोतवाली पोलीस ठाण्यात तक्रार नोंदवण्यात आली.