धिंग्रा चौकाच्या रुंदीकरणासाठी पाहणी

अकोला विकास आराखडा तयार करण्याची गरज.

अकोला: अरुंद रस्ते व विस्कळीत झालेल्या वाहतूक व्यवस्थेला रुळावर आणण्यासाठी रस्त्यांच्या रुंदीकरणाची गरज असल्याचा पाठपुरावा लोकमतने सतत केला. त्यानुषंगाने रस्ते विकासाच्या दिशेने पाऊल उचलत मनपाचे विरोधी पक्षनेता व अधिकार्‍यांनी धिंग्रा चौकाच्या रुंदीकरणासह सिव्हिल लाइन रस्त्याची गुरुवारी पाहणी केली. रस्त्यालगत थाटण्यात आलेले अतिक्रमण, बेशिस्त ऑटोचालक व खाद्यपदार्थांची विक्री करणार्‍यांच्या गर्दीमुळे रस्त्यावरून चालणेदेखील कठीण झाले आहे. त्यात भरीस भर अरुंद रस्ते, रस्त्याच्या मधोमध उभे ठाकलेल्या विद्युत खांबामुळे वाहतूक व्यवस्थेचा पुरता बोजवारा उडाला. शिवाय रस्त्यांवरील खड्डे चुकविण्याच्या नादात अपघाताच्या प्रमाणात वाढ झाली आहे. शहरातील अरुंद रस्त्यांचे रुंदीकरण झाल्यास वाहतुकीची कोंडी टाळता येईल. याकरिता मनपा प्रशासनाने अशा अरुंद रस्त्यांची पाहणी करून त्याचा विकास आराखडा तयार करण्याची अपेक्षा आहे. रस्त्यावरील खड्डे, अरूंद रस्ते व बेशिस्त वाहतुकीच्या समस्येवर लोकमतने प्रकाशझोत टाकल्यानंतर मनपाचे विरोधी पक्षनेता साजीद खान, बांधकाम विभागाचे कार्यकारी अभियंता जयप्रकाश मनोहर यांनी काही प्रमुख रस्त्यांची पाहणी केली. शहरातील सर्वाधिक वर्दळीच्या मदनलाल धिंग्रा चौकाची मनपा पदाधिकारी, अधिकार्‍यांनी पाहणी करीत अपेक्षित बदल शक्य असल्याचे मत व्यक्त केले. तसेच सिव्हिल लाइन रस्त्याची पाहणी करण्यात आली. यावेळी बांधकाम विभागातील उपअभियंता राजेश श्रीवास्तव यांच्यासह कनिष्ठ अभियंता उपस्थित होते.