मागणीएवढा पुरवठा न झाल्यास लसीकरणाला खोडा!

कोविड लसीकरण मोहिमेंतर्गत जिल्ह्यात ज्येष्ठनागरिकांसह ४५ वर्षावरील सहव्याधी असलेल्या लाभार्थींना कोविड लसीकरण केले जात आहे. यासोबतच आरोग्य कर्मचारी आणि फ्रंटलाईन कर्मचाऱ्यांना दुसरा डोस देखील देणे सुरू आहे. अशातच १ एप्रिलपासून ४५ वर्षावरील सर्वांनाच कोविड लस दिली जाणार आहे. त्यामुळे सध्यस्थितीत उपलब्ध लसीचा साठा अपुरा ठरणार आहे. नव्या नियोजनानुसार, जिल्ह्यातील एकूण लोकसंख्येच्या ३० टक्के म्हणजेच जवळपास ६ लाख लोकसंख्येला लस देण्याचे आरोग्य विभागाचे नियोजन असल्याची माहिती आहे. त्यापैकी आतापर्यंत जवळपास ७० हजार लोकसंख्येला लसीकरण झाले आहे. त्यानुसार, आरोग्य विभागाकडून वाढीव लसीची मागणी केली जाणार असून, त्याचे नियोजन शनिवारी केले जाणार आहे. परंतु, वाढीव मागणी येवढा लसीचा पुरवठा न झाल्यास लसीकरण मोहीम अडचणीत येण्याची शक्यता नाकारता येत नाही.

१६ जानेवारी जिल्ह्यात लसीकरण सुरू झाले

पहिला डोस - दुसरा डोस

आरोग्य सेवक - ९८१७ - ४१३६

फ्रंटलाईन वर्कर्स - ८३८९ - ४१३२

ज्येष्ठ नागरिक - ३५७७४

४५ वर्षावरील सहव्याधी असलेले- ७४१८

सध्या आठवड्याला २५ हजार डोसची मागणी

सद्यस्थितीत आठवड्याला २५ हजार डोसची मागणी आहे, मात्र १ एप्रिलपासून या मागणीत जवळपास दुपटीने वाढ होण्याची शक्यता आहे. त्यानुसार, आरोग्य यंत्रणेमार्फत नियोजन करण्यात येणार असल्याची महािती आहे.

एकूण लोकसंख्येच्या ३० टक्के लोकांना द्यावी लागणार लस

१ एप्रिलपासून ४५ वर्षावरील सर्वांनाच लसीकरण करण्यात येणार आहे. त्यामुळे लाभार्थींची संख्याही एकूण लोकसंख्येच्या ३० टक्के म्हणजेच ६ लाख होणार असल्याची माहिती वैद्यीकय अधिकाऱ्यांनी दिली आहे.

पुढील महिन्यापासून कोविड लसीची मागणी वाढणार आहे. त्यानुसार, नियोजन करण्यात येत असून, आवश्यक लसीची मागणी केली जाणार आहे. सध्यस्थितीत उपलब्ध लस लाभार्थींना दिली जात आहे.

- डॉ. मनिष शर्मा, जिल्हा समन्वयक, कोविड लसीकरण, अकोला