पीक कर्ज योजनेचा लाभ शेतकऱ्यांपर्यंत पोहोचवा!

अकोला: खरीप हंगामासाठी जिल्ह्यातील पीक कर्ज वाटपाचा आढावा घेत, पीक कर्ज वाटप योजनेचा जिल्ह्यातील जास्तीत जास्त शेतकऱ्यांपर्यंत लाभ पोहोचविण्याचे निर्देश जिल्हाधिकारी जितेंद्र पापळकर यांनी गुरुवारी जिल्ह्यातील बॅंकांना दिले.

जिल्हाधिकारी कार्यालयात आढावा बैठकीत ते बोलत होते. यावेळी स्टेट बॅंक ऑफ इंडियाचे क्षेत्रीय प्रबंधक श्रीआंशू, बॅंक ऑफ महाराष्ट्रचे विभागीय व्यवस्थापक अभिजित चन्दा, विदर्भ ग्रामीण बॅंकेचे क्षेत्रीय प्रबंधक सुबोध बन्नोरे, सेंट्रल बॅंक ऑफ इंडियाचे सहायक क्षेत्रीय प्रबंधक ज्ञानेश्वर टापरे, युनियन बॅंकेचे मुख्य प्रबंधक अतुल मोहोड, जिल्हा मध्यवर्ती बॅंकेचे महाव्यवस्थापक सुधाकर झळके आदी उपस्थित होते.

गत वर्षीच्या खरीप हंगामात पीक कर्ज योजनेंतर्गत जिल्ह्यात १ लाख ६ हजार ४३४ शेतकऱ्यांना पीक कर्जाचा लाभ देण्यात आला होता. यंदाच्या खरीप हंगामासाठी अद्यापपर्यंत जिल्ह्यातील ६४ हजार ५४६ शेतकऱ्यांना ५९३ कोटी ३३ लाख रुपयांचे पीक कर्ज वाटप करण्यात आले आहे. तथापि, यंदाच्या खरीप हंगामासाठी जिल्ह्यातील १ लाख ४२ हजार ५०० शेतकऱ्यांना पीक कर्ज वाटपाचे उद्दिष्ट असून, जिल्ह्यातील जास्तीत जास्त शेतकऱ्यांपर्यंत पीक कर्ज योजनेचा लाभ पोहोचविण्याचे निर्देश जिल्हाधिकारी पापळकर यांनी बॅंक अधिकाऱ्यांना दिले. खरीप हंगामासाठी पीक कर्ज वाटपाची मुदत १५ जुलैपर्यंत असून, जिल्ह्यातील अधिकाधिक शेतकऱ्यांनी या योजनेचा लाभ घेण्याचे आवाहनही जिल्हाधिकारी पापळकर यांनी केले.

पीक कर्ज व्याज सवलत योजनेस

३० जूनपर्यंत मुदतवाढ!

ज्या शेतकऱ्यांनी २०२०-२१ या वर्षाकरिता अल्पमुदती पीक कर्ज घेतले आहे, अशा शेतकऱ्यांना कर्ज परतफेडीची मुदत ३० जूनपर्यंत केंद्र शासनाने वाढविली असून, तीन लाख रुपयांपर्यंतच्या पीक कर्जासाठी केंद्र शासनाची व्याज सवलत योजना लागू राहणार आहे. तसेच जिल्हा मध्यवर्ती सहकारी बँक आणि जिल्ह्यातील विविध कार्यकारी सेवा सहकारी संस्था यांच्यामार्फत सन २०२०-२१ मध्ये वाटप केलेल्या खरीप पीक कर्ज परतफेडीस ३० जूनपर्यंत मुदतवाढ देण्यात आली आहे. या मुदतीत कर्जाची परतफेड केल्यास शून्य टक्के व्याज सवलतीचा लाभ देण्यात येणार आहे. त्यामुळे शेतकऱ्यांनी विहीत मुदतीत पीक कर्जाची परतफेड करून नवीन पीक कर्ज घेण्याचे आवाहन जिल्हाधिकारी जितेंद्र पापळकर, जिल्हा उपनिबंधक,सहकारी संस्था व्ही. डी. कहाळेकर, जिल्हा अग्रणी बॅंक व्यवस्थापक आलोक तारेणीया यांनी या बैठकीत केले.