फेब्रुवारी महिन्याच्या सुरुवातीलाच जिल्ह्यातील मुर्तिजापूर, अकोटसह महापालिका क्षेत्रातील काही भागात कोरोनाचे नवे हाॅटस्पॉट निर्माण होऊ लागले होते, मात्र गत आठवडाभरात रुग्णवाढीचा वेग झापाट्याने वाढत गेला. अकोल्यासह शेजारच्या अमरावती आणि यवतमाळ जिल्ह्यात देखील कोराेनाचा कहर सुरूच आहे. दरम्यान, अमरावती येथे कोरोनाचा नवा म्युटेट स्ट्रेन असल्याची शक्यता वर्तविण्यात आल्याने येथील काही कोविड रुग्णांचे नमुने वैद्यकीय चाचणीसाठी पुणे येथील एनआयव्हीमध्ये पाठविण्यात आले. अकोल्यातील रुग्णांमध्येही जनुकीय बदल झालेल्या कोरोना विषाणू असल्याची शक्यता नाकारता येत नाही. त्यामुळे खबरदारी बाळगत आरोग्य विभागातर्फे गुरुवारी रात्री ७५ कोविड रुग्णांचे नमुने तपासणीसाठी पुणे येथील नॅशनल इन्स्टिट्यूट ऑफ व्हायरालॉजीकडे पाठविण्यात आले आहेत. या नमुन्यांचा तपासणी अहवाल येत्या दोन ते तीन दिवसांत प्राप्त होणार असल्याचे वैद्यकीय अधिकाऱ्यांनी सांगितले.
कोविड संसर्गात हा आहे बदल
पूर्वीचा कोरोना
कोविड रुग्णांच्या संपर्कात आलेल्या व्यक्तीला चार ते पाच दिवसानंतर लक्षणे दिसायची
सर्दी, कोरडा खोकला, धाप लागणे.
ताप येणे, ऑक्सिजनची पातळी कमी होणे.
संसर्गाचा वेग कमी
म्युटेट स्ट्रेन
कोविड रुग्णाच्या संपर्कात आलेल्या व्यक्तीला २४ तासांतच लक्षणे दिसायला लागतात.
सर्दी, कोरडा खोकला, धाप लागणे,
ताप येणे, ऑक्सिजनची पातळी कमी होणे.
ससर्गाचा वेग जास्त
मास्क हीच सुरक्षेची ढाल
कोरोना संसर्गाचा झपाट्याने फैलाव होत असून, नव्या स्ट्रेनचा धोकाही वाढला आहे. त्यामुळे नागरिकांनी आवश्यक खबरदारी घेण्याचे आवाहन आरोग्य विभागातर्फे करण्यात येत आहे. कोरोनाच्या संसर्गापासून स्वत:च्या संरक्षणासाठी सुरक्षेची ढाल म्हणून मास्कचा वापर करावा, असे आवाहन देखील करण्यात आले आहे.
जिल्ह्यात कोरोनाच्या फैलावाची गती लक्षात घेता नव्या स्ट्रेनचा धोका नाकारता येत नाही. त्या अनुषंगाने खबरदारी म्हणून ७५ कोविड रुग्णांचे नमुने तपासणीसाठी पुणे येथील एनआयव्ही कडे पाठविण्यात आले आहेत. येत्या दोन ते तीन दिवसांत तपासणीचे अहवाल प्राप्त होणार आहे. त्यानंतरच पुढील चित्र स्पष्ट होणार आहे.
- डॉ. सुरेश आसोले, जिल्हा आरोग्य अधिकारी, अकोला