कोरोनाने अख्खं कुटूंबच केलं उद्ध्वस्त!

पत्नी, मुलगी पाठोपाठ समाज क्रांती आघाडीचे संस्थापक अध्यक्ष व आंबेडकरी चळवळीतील ज्येष्ठ नेते ॲड. प्रा. मुकुंद खैरे (६३) यांचे बुधवारी सकाळी ९:३० वाजता अकोला येथील खासगी रुग्णालयात कोरोनामुळे निधन झाले.

प्रा. मुकुंद खैरे हे अनेक दिवसांपासून कोरोना आजाराशी लढा देत होते. त्यांच्या पत्नी व मुलीलाही कोरोनाची लागण झाली होती. गत आठवड्यात पत्नीचे तर २ मे रोजी मुलीचे कोरोनामुळे निधन झाले होते. त्यानंतर ५ मे रोजी उपचारादरम्यान मुकुंद खैरे यांचे निधन झाले. त्यांनी येथील गाडगे महाराज महाविद्यालयात राज्यशास्त्राचे प्राध्यापक म्हणून कार्य करीत असतानाच समाज क्रांती आघाडी या सामाजिक संस्थेची चैत्यभूमी मुंबई येथे ६ डिसेंबर १९९१ रोजी स्थापना केली. ही संघटना पुढे नेत, त्यांनी संघटनेचे देशभर जाळे विणले. राज्यघटनेचे ते गाढे अभ्यासक होते. त्यांनी अनेक आंदोलने करून शोषितांच्या हक्कासाठी लढा दिला.

बुद्धगया मुक्ती आंदोलन, संविधान बचाव, राजकारणाला भ्रष्टाचारातून मुक्तीचे आंदोलन, दसरा छोडो, २४ ऑक्टोबर का स्वीकार करो, भूमिहीनांचे प्रश्न, आरोग्याच्या अधिकारासाठी सातत्याने ते झटले.

१० वर्षांपूर्वी त्यांनी विधानसभा आणि लोकसभा निवडणूक लढविली. भारतरत्न डॉ. बाबासाहेब आंबेडकरांच्या विचारांनुसार त्यांनी वाटचाल करीत, बहुजन समाजासाठी कार्य केले. आठ दिवसांपूर्वी पत्नी छायाताई खैरे, शताब्दी मुलगी कोरोनाने यांचे निधन झाले. कोणताही राजकीय वारसा नसताना राजकारणात त्यांनी स्वतंत्र प्रतिमा निर्माण केली. त्यांच्या अकाली निधनाने मूर्तिजापूर तालुक्यात शोककळा पसरली.

धाकट्या मुलीवर आईवडील, बहिणीच्या अंत्यसंस्काराची वेळ

प्रा. मुकुंद खैरे यांचे कुटुंब म्हणजे पत्नी छाया आणि अर्चना, शताब्दी आणि श्वेता अशा तीन मुली. वैचारिक आणि सामाजिक अधिष्ठान लाभलेले हे मूर्तिजापुरातील अतिशय आनंदी असे सुंदर कुटुंब. त्यांचे कारंजा रोडवरील घर मूर्तिजापूरसह जिल्ह्यातील आणि चळवळीतील अनेकांसाठी मदत मिळण्याचे हक्काचे केंद्र होते. २००४ ला प्रा. मुकुंद खैरे यांची माेठी मुलगी अर्चना हिचा अपघातात जागीच मृत्यू झाला. या अपघातातून खैरे आणि लहान मुलगी बचावले. आता अवघ्या पंधरा दिवसात या कुटुंबातील तीन जणांचा कोरोनाने बळी घेतला. १९ एप्रिलला प्रा. खैरे यांच्या पत्नी छाया यांचे अकोल्यात कोरोनावर उपचारादरम्यान निधन झाले. तर २ मे रोजी त्यांची ३२ वर्षीय वकील असलेली मुलगी शताब्दी यांचे निधन झाले. शताब्दी उच्च न्यायालयाच्या नागपूर खंडपीठात पाच वर्षांपासून वकिली करीत होत्या. आज सकाळी प्रा. खैरे यांचाही कोरोनाने मृत्यू झाला. तब्बल वीस दिवसांपासून त्यांचा रुग्णालयात कोरोनाशी संघर्ष सुरू होता. प्रा. खैरे यांची सर्वात लहान मुलगी श्वेता हिच्यावर अवघ्या पंधरा दिवसांत आई, बहीण आणि वडील यांच्यावर अंत्यसंस्कार करण्याचा दुर्दैवी प्रसंग ओढवला आहे.

फोटो :