महात्मा फुले जयंती कार्यक्रमात बाप-लेकाचा धुमाकूळ; एकाला मारहाण

हातगाव ग्रामपंचायत कार्यालयात महात्मा जोतिबा फुले यांच्या जयंतीचा कार्यक्रम सकाळी १०.३० वाजता सुरू होता. येथील सुरेश पुंडलिक जोगळे व त्यांचा मुलगा अक्षय जोगळे यांनी ग्रामपंचायतमधील आयोजित कार्यक्रमात येऊन धुमाकूळ घातला व दिग्विजय गाढेकर यांना बेदम मारहाण केली. दरम्यान, अक्षय जोगळे याने डॉ. बाबासाहेब आंबेडकर यांच्या प्रतिमेची विटंबना करून गावात जातीय तेढ निर्माण करण्याचा प्रयत्न केल्याचा आरोप सरपंच अक्षय राऊत यांनी पत्रकार परिषदेत व पोलिसांत दिलेल्या तक्रारीत केला आहे. येथील ग्रामपंचायत निवडणूक नुकतीच पार पडली. अक्षय जोगळे हा उपसरपंच निवडणुकीत पराभूत झाला. पराभव जिव्हारी लागल्याने दिग्विजय गाढेकर यांच्यावर संतप्त बाप-लेकाने सहकाऱ्यांसह हल्ला चढविला. याप्रकरणी शहर पोलिसांनी दोघांविरुद्ध ३२४, ३२३ नुसार गुन्हा दाखल केला आहे.