अकोला: वाईन शॉपमधून दारूची बाटली घेतल्यानंतर कर्मचाऱ्याने पैशांची मागणी केली असता मद्यपीने संतापून काचेची दारूची बाटली कर्मचाऱ्याच्या डोक्यावर फोडली. या हल्ल्यात कर्मचारी निरज तेलकर गंभीर जखमी झाला आहे. ही घटना ४ सप्टेंबर रोजी दुपारी घडली. या प्रकरणात कोतवाली पोलिसांनी ५ सप्टेंबर रोजी गुन्हा दाखल केला आहे.
पोलिसांकडून गुन्हा दाखल शिवाजी नगरात राहणारा निरज गणेश तेलकर (३२) याच्या तक्रारीनुसार तो चांदेकर चौकातील देशी दारूच्या दुकानात काम करतो. ४ सप्टेंबर रोजी दुपारी ३ वाजताच्या सुमारास युसूफ नामक व्यक्ती तेथे आला. त्याने दारूची क्वार्टर मागितली. त्याला क्वार्टर दिल्यानंतर पैसे मागितले असता, त्याने पैसे नाहीत, असे सांगितले. त्यामुळे त्याला क्वार्टर परत दे, असे म्हटल्यावर, त्याने निरज तेलकर याच्या डोक्यावर काचेची दारूची बाटली फोडून त्याला गंभीर जखमी केले. तसेच युसूफने यापुढे दारूचे पैसे मागितले तर जीवे मारण्याची धमकी दिली. पोलिसांनी आरोपीविरुद्ध भादंवि कलम ३२४, ५०४, ५०६ नुसार गुन्हा दाखल केला आहे.