जिल्हा परिषदेच्या अनुकंपा पदभरतीत ४० उमेदवारांना नियुक्ती!

अकोला: जिल्हा परिषदेच्या अनुकंपा पदभरती प्रक्रियेत विविध पदांसाठी निवड करण्यात आलेल्या ४० उमेदवारांना सोमवार, १ फेब्रुवारी रोजी नियुक्ती देण्यात आली. जिल्हा परिषद सभागृहात समुपदेशनाद्वारे उमेदवारांना पदस्थापना आदेश देण्यात आला.

जिल्हा परिषदेअंतर्गत सेवेत कार्यरत असताना विविध कारणांमुळे मृत्यू झालेल्या कर्मचाऱ्यांच्या पाल्यांना अनुकंपा तत्त्वावर ज्येष्ठता यादीनुसार रिक्त पदांवर नियुक्ती दिली जाते. त्यासाठी जिल्हा परिषद प्रशासनामार्फत अनुकंपा पदभरती प्रक्रिया राबविण्यात आली. त्यामध्ये जिल्हा परिषद प्रशासनामार्फत १६९ अनुकंपा उमेदवारांच्या कागदपत्रांची तपासणी केली होती. त्यापैकी शैक्षणिक पात्रता आणि जिल्हा परिषदेअंतर्गत उपलब्ध रिक्त पदांपैकी दहा टक्के रिक्त पदांसाठी ४२ उमेदवारांची निवड यादी तयार करण्यात आली होती. परंतु, त्यापैकी दोन उमेदवारांकडून आवश्यक ती कागदपत्रे सादर करण्यात आली नसल्याने, ४० उमेदवारांची अंतिम निवड यादी जिल्हा परिषद प्रशासनामार्फत १५ जानेवारी रोजी जिल्हा परिषदेच्या संकेतस्थळावर प्रसिध्द करण्यात आली होती. निवड केलेल्या ४० अनुकंपा उमेदवारांना १ फेब्रुवारी रोजी समुपदेशनाद्वारे रिक्त पदांवर नियुक्तीचा आदेश देण्यात आला. जिल्हा परिषद मुख्य कार्यकारी अधिकारी सौरभ कटियार, उपमुख्य कार्यकारी सुरज गोहाड आदी संबंधित अधिकाऱ्यांच्या उपस्थितीत समुपदेशनाद्वारे अनुकंपा उमेदवारांची रिक्त पदांवर पदस्थापना करण्यात करण्यात येत असल्याचा आदेश देण्यात आला.

‘या’ रिक्त पदांवर दिली नियुक्ती!

जिल्हा परिषदअंतर्गत रिक्त असलेल्या विविध पदांवर ४० अनुकंपा उमेदवारांना नियुक्ती देण्यात आली. त्यामध्ये कंत्राटी ग्रामसेवक, परिचर, स्थापत्य अभियांत्रिकी सहायक, अंगणवाडी पर्यवेक्षिका, औषध निर्माण अधिकारी, जोडारी व वरिष्ठ सहाय्यक (लेखा) इत्यादी रिक्त पदांवर ४० उमेदवारांना नियुक्ती देण्यात आली.