अकोला जिल्ह्यात आणखी एकाचा मृत्यू, २२ नवे पॉझिटिव्ह

coronaVirus News आणखी एकाचा मृत्यू झाल्याने कोरोनाबळींची संख्या ३३८ झाली आहे.

अकोला : जिल्ह्यात कोरोना विषाणू संसर्गाचे सत्र सुरूच असून, बुधवार ३ फेब्रुवारी रोजी शहरातील आणखी एकाचा मृत्यू झाल्याने कोरोनाबळींची संख्या ३३८ झाली आहे. आरटीपीसीआर चाचण्यांमध्ये आणखी २२ जणांचे अहवाल पॉझिटिव्ह आल्याने एकूण रुग्णसंख्या ११,६८७ वर पोहोचली आहे.

शासकीय वैद्यकीय महाविद्यालयाच्या व्हीआरडीएल लॅबकडून बुधवारी दिवसभरात आरटीपीसीआर चाचण्यांचे ३४८ अहवाल प्राप्त झाले. यापैकी २२ जणांचे अहवाल पॉझिटिव्ह असून, उर्वरित ३२६ अहवाल निगेटिव्ह आहेत. सकाळी पॉझिटिव्ह अहवाल आलेल्यांमध्ये मूर्तिजापूर येथील तीन, अकोट व सिंधी कॅम्प येथील प्रत्येकी दोन, खरप, कौलखेड, खडकी, पणन ता. अकोट, मचाणपूर ता. अकोट, पिंपळखुटा ता. अकोट, राऊतवाडी, आझाद नगर, जवाहर नगर, अजय कॉलनी व जठारपेठ येथील प्रत्येकी एक रुग्णांचा समावेश आहे. सायंकाळी बोरगाव मंजू येथील दोन, कोठारी व शिवाजी नगर येथील प्रत्येकी एकाचा अहवाल पॉझिटिव्ह आला.

६८ वर्षीय पुरुष दगावला

खाजगी रुगणालयात उपचार घेत असलेल्या एका कोरोनाबाधिताचा बुधवारी मृत्यू झाला. हा रुग्ण पिल कॉलनी, एमआयडीसी रोड, अकोला येथील ६८ वर्षीय पुरुष असून, त्यांना २५ जानेवारी रोजी दाखल करण्यात आले होते.

१९ कोरोनामुक्त

शासकीय वैद्यकीय महाविद्यालय येथून चार, आयकॉन हॉस्पिटल येथून एक, स्कायलार्क हॉटेल येथून पाच, बिहाडे हॉस्पिटल येथून तीन, तसेच होम आयसोलेशनचा कालावधी पूर्ण झालेले सहा अशा एकूण १९ जणांना बुधवारी डिस्चार्ज देण्यात आला.

 

७१६ ॲक्टिव्ह पॉझिटिव्ह

जिल्ह्यात आतापर्यंत एकूण ११,६८७ जणांना कोरोनाची लागण झाली असून, त्यापैकी तब्बल १०,६३३ रुग्णांनी कोरोनावर मात केल्याने त्यांना डिस्चार्ज देण्यात आला आहे. आतापर्यंत ३३८जणांचा मृत्यू झाला असून, सद्यस्थितीत ७१६ ॲक्टिव्ह रुग्ण आहेत.