कावड मार्गावरील २ कि.मी. ‘पॅचिंग’चे काम सुरू करा!

जिल्हाधिका-यांनी केली कावड मार्गाची पाहणी; रस्ता दुरूस्तीचे दिले निर्देश. अकोला : श्रावण महिन्यातील शेवटच्या सोमवारी ७ सप्टेंबर रोजी अकोल्यात कावड उत्सव साजरा करण्यात येणार आहे. या पृष्ठभूमीवर जिल्हाधिकारी तथा महानगरपालिकेचे प्रभारी आयुक्त जी.श्रीकांत यांनी बुधवारी राजराजेश्‍वर मंदिरापासून गांधीग्रामपर्यंत १६ किलोमीटर कावड उत्सव मार्गाची पाहणी करून, या मार्गावरील २ किलोमीटर रस्त्याच्या ह्यपॅचिंगह्णचे काम गुरुवारपासून सुरू करण्याचे निर्देश मनपाच्या अधिकार्‍यांना दिले. श्रावण महिन्यातील शेवटच्या सोमवारी अकोला शहराचे आराध्य दैवत श्री राजराजेश्‍वराला जलाभिषेक करण्यासाठी कावड उत्सव साजरा केला जातो. त्यानुषंगाने जिल्हाधिकारी तथा मनपाचे प्रभारी आयुक्त जी.श्रीकांत यांनी श्री राजराजेश्‍वर मंदिराला भेट देऊन, राजेश्‍वर मंदिरापासून गांधीग्रामपर्यंत कावड मार्गाची पाहणी केली. कावड मार्गावरील १६ किलोमीटर रस्त्यावरील खड्डे पडलेल्या २ किलोमीटर रस्त्याच्या पॅचिंगचे काम गुरुवारपासून सुरू करण्याचे निर्देश मनपाच्या संबंधित विभागाच्या अधिकार्‍यांना ज्लिहाधिकार्‍यांनी दिले. तसेच कावड उत्सवादरम्यान करावयाच्या विविध उपाययोजनांची कामे तातडीने पूर्ण करण्याच्या सूचना त्यांनी संबंधित विभागाच्या अधिकार्‍यांना दिल्या. त्यामध्ये प्रामुख्याने कावड मार्गावरील वाहतूक वळती करण्याच्या सूचना वाहतूक शाखेला देण्यात आल्या असून, कावड उत्सवादरम्यान कडेकोट पोलीस बंदोबस्त तैनात करण्याच्या सूचना पोलीस विभागाला देण्यात आल्या. यावेळी जिल्हाधिकार्‍यांसोबत अकोल्याचे उपविभागीय अधिकारी संजय खडसे, तहसीलदार संतोष शिंदे, मनपा व इतर संबंधित विभागाचे अधिकारी उपस्थित होते. ढोल-ताशे इत्यादी वाद्यांसह पारंपरिक पद्धतीने कावड उत्सव भाविकांनी साजरा करण्याचे आवाहन करीत, उत्सवाची प्रशासनामार्फत तयारी करण्यात आल्याचेही जिल्हाधिकारी जी.श्रीकांत यांनी सांगितले.