खंडणीच्या गुन्ह्यात युवा सेनेच्या शहरप्रमुखास अटक

नेप्ती कांदा मार्केट येथील गाळा क्रमांक ९७ येथे गुरुवारी दुपारी सव्वाचार वाजता ही घटना घडली. याप्रकरणी व्यापारी महेश जवाहरलाल भराडिया (वय ३३, रा.वांबोरी, ता. राहुरी) यांनी दिलेल्या फिर्यादीवरून अक्षय दिलीप कोके (रा. अक्षदा गार्डन समोर, नगर), हर्षवर्धन महादेव कोतकर (रा.एकनाथनगर, केडगाव) व राजेंद्र गोरख रासकर (रा. चास, ता. नगर) यांच्याविरोधात गुन्हा दाखल करण्यात आला. आरोपींनी भराडिया यांना वारंवार फोन करून तू जमिनीचा व्यवहार मोडला आहेस. त्यामुळे तुला पैसे द्यावे लागतील, अशी धमकी देऊन २० हजार रुपयांची मागणी केली. ४ फेब्रुवारी रोजी दुपारी अक्षय कोके व त्याच्यासोबत असलेल्या एकाने भराडिया यांच्या दुकानात येऊन हर्षवर्धन कोतकर याला फोन केला. त्यानंतर कोतकर याने २० हजार रुपये देण्याचे भराडिया यांना सांगितल्यानंतर त्यांनी कोके याच्याकडे पैसे दिले. यावेळी भराडिया यांच्या दुकानात सध्या वेषात बसलेल्या पोलिसांनी कोके व त्याच्यासोबत असलेला राजेंद्र रासकर याला ताब्यात घेतले. त्यानंतर हर्षवर्धन कोतकर यालाही अटक केली. याप्रकरणी नगर तालुका पोलीस ठाण्याचे सहायक पोलीस निरीक्षक राजेंद्र सानप हे अधिक तपास करीत आहेत.