Ahilyanagar Crime: अहिल्यानगरमध्ये हातात पिस्तूल घेतलेला फोटो दाखवत स्पर्धा परीक्षेची तयारी करणाऱ्या तरुणीला धमकावल्याचा धक्कादायक प्रकार समोर आला आहे. गेल्या आठ वर्षापासून पाठलाग करून आरोपी तरुणीला त्रास देत होता. या प्रकरणी तोफखाना पोलिस ठाण्यात रविवारी गुन्हा दाखल झाला आहे.
ओंमकार ज्ञानेश्वर सुपेकर असे गुन्हा दाखल झालेल्या तरुणाचे नाव आहे. शहरातील एका महाविद्यालयात शिक्षण घेत असताना २०१७ मध्ये तरुणीची आरोपीशी ओळख झाली होती. मित्र समजून ती त्याच्याशी बोलत होती. त्यानंतर २०२०मध्ये त्याने फोन करून लग्नासाठी मागणी घातली. तिने लग्नास नकार दिला. त्याचा त्याला राग आला. त्याने तरुणीला शिवीगाळ करत दमदाटी केली, तसेच घरच्यांना जीवे मारण्याची धमकी दिली. यामुळे तरुणीने त्याचा मोबाइल नंबर ब्लॅक लिस्टला टाकला, तरीही तो तिला त्रास देत होता. दुसऱ्यांच्या फोनवरून धमकावत होता. ही बाब तिने घरच्यांना सांगितली. नातेवाइकांनी त्याच्या आई-वडिलांना समजावून सांगितले. त्यांनीही यापुढे असे होणार नाही, अशी खात्री दिली.
स्पर्धा परीक्षेची तयारी करत असल्याने ती क्लासला जात होती. २०२३ मध्ये त्याने तिला क्लासच्या समोर गाठले व दुचाकीची चावी घेऊन त्रास दिला. तेव्हापासून तो तिला त्रास देत होता. रविवारी त्याने पुन्हा पीडितेला गाठले आणि हातात पिस्तूल घेतलेला फोटो दाखवत लग्न कर, अशी धमकी दिली. यामुळे घाबरलेल्या तरुणीने पोलिसांत तक्रार दाखल केली.
Web Summary : A student preparing for competitive exams in Ahilyanagar was threatened with marriage and shown a pistol photo by a stalker. The accused had been harassing her for eight years. Police have registered a case.
Web Summary : अहिल्यानगर में प्रतियोगी परीक्षाओं की तैयारी कर रही एक छात्रा को एक पीछा करने वाले ने शादी की धमकी दी और पिस्तौल की तस्वीर दिखाई। आरोपी आठ साल से उसे परेशान कर रहा था। पुलिस ने मामला दर्ज कर लिया है।