साईनगरीतून भिक्षेकरी हटवण्यासाठी उपोषणाचा इशारा

भिक्षेकरी प्रकरणी नगरपंचायतविरोधात राष्ट्रवादी-शिवसेना आक्रमक

लोकमत न्यूज नेटवर्क

शिर्डी : भाविकांना होणारा त्रास कमी करण्यासाठी वारंवार मागणी करूनही भिक्षेकऱ्यांना पाठीशी घालणारी शिर्डी नगरपंचायत भिक्षेकऱ्यांची आश्रयदाती आहे का? असा सवाल शिवसेना व राष्ट्रवादीच्या वतीने उपस्थित करण्यात आला आहे. भिक्षेकऱ्यांवर कारवाई न केल्यास येत्या गुरुवारी मुख्याधिकाऱ्यांच्या दालनात उपोषण करण्याचा इशारा पदाधिकाऱ्यांनी दिला आहे.

शिर्डीत मोठ्या प्रमाणावर भिक्षेकरी असून, त्यात व्यसनी, गुन्हेगारी प्रवृत्तीचेही लोक आहेत. या भिक्षेकऱ्यांना पकडून साईसंस्थानच्या इमारतीत त्यांना वैद्यकीय, भोजन, निवास व्यवस्था पुरविण्याबाबत संस्थानचे सीईओ, पोलीस निरीक्षक, नगरपंचायत मुख्याधिकारी व ग्रामस्थांच्या संयुक्त बैठकीत निर्णय घेण्यात आला होता. पोलिसांनी विसापूर भिक्षेकरी गृहाकडे चौकशी केली असता तेथे १६० जागा रिक्त असल्याचे त्यांनी कळवले होते. हे दोन्ही पर्याय असतांना नगरपंचायत भिक्षेकऱ्यांकडे दुर्लक्ष करून त्यांची पाठराखणच करत आहे. यामागे काय गौडबंगाल आहे? असा सवाल निवेदनाद्वारे उपस्थित करण्यात आला आहे. सध्या कळस दर्शन व मुखदर्शनासाठी येणाऱ्या भाविकांना भिक्षेकऱ्यांचा मोठा त्रास सहन करावा लागतो. नगरपंचायत या विषयाकडे दुर्लक्ष करत असल्याच्या निषेधार्थ गुरुवार, दि. २३ जुलै रोजी मुख्याधिकाऱ्यांच्या दालनात उपोषणास बसण्याचा निर्णय घेण्यात आला आहे. या संदर्भातील निवेदन मुख्याधिकारी, संस्थान सीईओ व पोलीस उपअधीक्षकांना देण्यात आले.

निवेदनावर शिवसेनेचे कमलाकर कोते, तालुकाध्यक्ष संजय शिंदे, शहर प्रमुख सचिन कोते, राहुल गोंदकर, माजी उपनगराध्यक्ष विजय जगताप, राष्ट्रवादीचे तालुका उपाध्यक्ष सुधाकर शिंदे, जिल्हा उपाध्यक्ष रमेशराव गोंदकर, शहराध्यक्ष महेंद्र शेळके, माजी उपनगराध्यक्ष नीलेश कोते, तालुकाध्यक्ष संदीप सोनवणे, माजी जिल्हाध्यक्ष अमित शेळके आदींची नावे आहेत.

................

भिक्षेकऱ्यांवर कारवाईचे अधिकार पोलिसांना आहेत. नगरपंचायत त्यांना मदत करत आहे. नगरपंचायतची भूमिका समजावून सांगणे आहे. निवडणुकीच्या तोंडावर प्रसिद्धीसाठी विरोधकांचा फार्स आहे.

-शिवाजी गोंदकर, नगराध्यक्ष