अण्णाभाऊ साठे यांचे अप्रकाशित साहित्य जगासमोर येणार

मिलिंदकुमार साळवे, श्रीरामपूर
जलसे व शाहिरी परंपरेतून समाजाचे प्रबोधन करीत ‘जग बदल घालूनी घाव, सांगून गेले भीमराव’ म्हणणाऱ्या साहित्यरत्न लोकशाहीर अण्णाभाऊ साठे यांचे संपूर्ण वाङ्मय ग्रंथ स्वरुपात जगासमोर येणार आहे. त्यामुळे अण्णाभाऊ साठे यांचे अप्रकाशित साहित्यही जगासमोर येण्याचा मार्ग मोकळा झाला आहे़
साहित्यरत्न लोकशाहीर अण्णाभाऊ साठे यांच्या चरित्रावर प्रकाशित केलेल्या ग्रंथांना महाराष्ट्रासह देश-विदेशात मोठ्या प्रमाणात मागणी आहे. या मागणीच्या अनुषंगाने राज्य विधिमंडळाच्या सन २०१३ च्या पावसाळी अधिवेशनात विधानसभेत तारांकित प्रश्न (क्रमांक ११६१४९) उपस्थित झाला होता. त्यावर उत्तर देताना उच्च व तंत्र शिक्षणमंत्री राजेश टोपे यांनी साहित्यरत्न अण्णाभाऊंचे साहित्य प्रकाशित करण्यासाठी एक महिन्यात समिती गठीत करण्यात येईल, असे आश्वासन दिले होते. त्यावर वर्षभराने या समितीचा मुहूर्त निघाला. त्यानुसार त्यांचे संपूर्ण वाङ्मय ग्रंथ स्वरुपात प्रकाशित करण्यासाठी समिती गठीत करण्याचा निर्णय घेऊन समितीला १६ जून २०१४ रोजी मंजुरी देण्यात आली. समितीची मुदत ३ वर्षे आहे. १ संशोधन सहायक, २ लिपिक टंकलेखक व १ शिपाई नेमण्यास मंजुरी देण्यात आली आहे.
अशी आहे प्रकाशन समिती
उच्च व तंत्र शिक्षणमंत्री (अध्यक्ष), उच्च व तंत्र शिक्षण राज्यमंत्री (उपाध्यक्ष), पुण्याचे आमदार रमेश बागवे, जालन्याचे डॉ. दिलीप अर्जुने व उच्च शिक्षण संचालक समितीचे निमंत्रक आहेत. तर शिवाजी खंडू कांबळे (नांदेड), प्रा. राजेंद्र कुंभार (कोल्हापूर), प्रा. डॉ. संजय दासू शिंदे (औरंगाबाद),डॉ. माधव गादेकर (वडवणी, जि. बीड), डॉ. प्रमोद गारोडे (अमरावती), प्रा. डॉ. अश्रू जाधव (मांढळ, ता. कुही, नागपूर), प्रा. डॉ. बाबूराव अंभोरे (अमरावती), संचालक शासकीय मुद्रणालय व लेखनसामुग्री व प्रकाशन (सर्व सदस्य).
समितीची कार्यकक्षा
साहित्यरत्न लोकशाहीर अण्णाभाऊ साठे यांचे समग्र वाङ्मय प्रसिद्ध करुन त्याचे हिंदी, इंग्रजी आदी भाषांमध्ये प्रकाशित करणे. अण्णाभाऊंचे अद्ययावत व सप्रमाण चरित्र लिहून त्याचे हिंदी, इंग्रजी आदी भाषांमध्ये भाषांतर करणे व प्रसिद्ध करणे. त्यांच्या जीवन कार्यावरील तसेच समीक्षापर साहित्य प्रकाशित करणे. त्यांच्या अप्रकाशित साहित्याचे संकलन व संपादन करणे. त्यांच्या प्रकाशित साहित्याचे संशोधन करणे.