सरपंचपदी रामदास घोडके यांची बिनविरोध निवड

श्रीगोंदा तालुक्यातील घोडेगाव ग्रामपंचायतीच्या सरपंचपदी रामदास घोडके यांची नुकतीच बिनविरोध निवड झाली. ग्रामपंचायतीच्या स्थापनेनंतर प्रथमच अनुसूचित जाती प्रवर्गातील व्यक्तीला सरपंचपदी संधी मिळाली आहे.

ग्रामपंचायतीच्या नऊ जागांसाठी निवडणूक झाल्यानंतर ग्रामविकास मंडळाला पाच जागा, परिवर्तन मंडळाला तीन जागा, तर एक जागा बिनविरोध निवडून आली होती. सरपंचपद अनुसूचित जाती प्रवर्गातील महिलेसाठी आरक्षित होते; परंतु संबंधित प्रवर्गासाठी सदस्यासाठी एकही जागा आरक्षित नव्हती. त्यामुळे गेल्या महिन्यात झालेल्या ग्रामपंचायत पदाधिकारी निवडीमध्ये केवळ उपसरपंचपदाची निवडणूक घेण्यात आली. त्यावेळी उपसरपंचपदी सोनाली सचिन फटे यांची निवड झाली होती. सरपंचपद रिक्त ठेवण्यात आले.

त्यानंतर सरपंचपदाच्या आरक्षित जागेवर महिला सदस्य नसेल तर पुरुषाला सरपंचपदी संधी देण्याचा निर्णय शासकीय पातळीवर घेण्यात आला. त्यानुसार सरपंच पदासाठी पुन्हा निवडणूक कार्यक्रम घेण्यात आला. सरपंचपदासाठी रामदास घोडके यांचा एकमेव अर्ज आल्यामुळे बिनविरोध निवड झाल्याचे जाहीर करण्यात आले.