ओगदी येथील दरोड्यातील दोन आरोपी जेरबंद

कोपरगाव : कोपरगाव तालुक्यातील ओगदी येथील जोरवर या शेतकरी कुटुंबावर ९ जानेवारीला पहाटे पावणे दोन वाजेच्या सुमारास तीन दरोडेखोरांनी दरोडा टाकून घराचा दरवाजा दगडाने तोडून घरातील रोख रकमेसह कपाटातील दागिने असा एकूण ३ लाख १८ हजार रुपयांचा मुद्देमाल लुटून नेला होता, तसेच दरोडेखोरांनी घरात एकट्याच असलेल्या कमलबाई लक्ष्मण जोरवर (वय ४५) यांना लाकडी दांड्याने मारहाण करून जखमी करून दरोडेखोर फरार झाले होते.

दरम्यान, १२ जानेवारीला येवला तालुक्यातील हॉटेल दशमेरा परिसरात एकूण ६ दरोडेखोर चारचाकी गाडीत चोरीच्या तयारीत दबा धरून बसलेले असताना, त्यांना येवला व नाशिक पोलिसांनी मोठ्या शिताफीने पकडले आहे. त्या सहा दरोडेखोरांपैकी ओगदी येथील दरोड्यातील सचिन उर्फ संजय उर्फ बोंग्या सखाहरी चव्हाण (रा. पढेगाव ता. कोपरगाव) व सचिन विरुपन्न भोसले (रा. गंगापूर जि. औरंगाबाद) हे दोघांना अटक केली आहे, तर त्यांचा तिसरा साथीदार अद्याप फरार आहे. अटक केलेल्या दरोडेखोरांना कायदेशीर प्रक्रिया पूर्ण करून, लवकरच कोपरगाव तालुका पोलिसांच्या ताब्यात घेणार असल्याची माहिती पोलीस निरीक्षक दौलतराव जाधव यांनी शनिवारी (दि.१६) दिली आहे.