सोनई : नगर-औरंगाबाद महामार्गावरील घोडेगाव चौफुली येथे शुक्रवारी (१७ जुलै) रात्री दोन वाजण्याच्या सुमारास दोन चंदन चोराना मुद्देमालांसह सोनई पोलिसांनी जेरबंद केले.
सोनई पोलीस ठाण्याचे सहाय्यक पोलीस निरीक्षक जनार्दन सोनवणे यांच्या पथकानेचांदा -घोडेगांव या रस्त्यावर ही कार्यवाही केली. चांदा (ता.नेवासा) येथील बाळासाहेब हरिभाऊ गायकवाड हा चांद्याकडून घोडेगावकडे जाणार असल्याच्या माहिती पोलिसांना खब-याकडून मिळाली होती. त्या आधारे सोनई पोलिसांनी तत्काळ घोडेगाव चौफुली येथे रात्री दीड वाजण्याच्या सुमारास सापळा रचून पिकअप क्रंमाक एम.एच.१५, डी.के.४८३८ गाडीसह बाळासाहेब गायकवाड, वाहन चालक पोपट जगन्नाथ पुंड ( रा. चांदा, ता. नेवासा ) या दोघांना ताब्यात घेतले. त्यांच्याकडून ४१ हजार २५० रुपयांचे चंदन जप्त केले आहे.
पोलिसांनी या दोन्ही आरोपींना न्यायालयासमोर हजर केले असता त्यांना २२ जुलैपर्यंत पोलीस कोठडी सुनावली आहे.