... तर तुम्हाला तोंड दाखवायला जागा उरणार नाही

कोपरगाव : गेल्या २५ वर्षांपासून मी एकच कायदेशीर व्यवसाय करतो आहे. मी विकत घेतलेली संपत्ती बाजार भावाप्रमाणे व शासकीय नियमानुसार व्यवहार करून घेतली आहे. आपल्या म्हणण्यानुसार कोल्हे परिवाराचे पैसे सांभाळण्याचे व हिशोब ठेवण्याचे काम करतो.

तर मग याच्याशीच निगडित २०१४ च्या विधानसभेच्या निवडणुकीचा तुमचा आर्थिक लेखाजोखा मांडला तर तुम्हाला शहरात तोंड दाखवायला जागा राहणार नाही आणि तुमची इच्छाच असेल तर डॉ. बाबासाहेब आंबेडकर स्मारकावर जाहीर सांगू शकतो, असे अमृत संजीवनीचे अध्यक्ष पराग संधान यांनी नगराध्यक्ष विजय वहाडणे यांचा समाचार घेतला.

नगराध्यक्ष विजय वहाडणे यांनी नुकतीच एक पत्रकार परिषद घेऊन भाजपा नेते पराग संधान यांच्यासह भाजप व शिवसेनेच्या काही नगरसेवकांवर व्यक्तिगत पातळीवर नावे घेऊन जाहीर टीका केली होती. त्याचे उत्तर देण्यासाठी त्यांच्याकडून सोमवारी ( दि.१ मार्च ) भाजपा संपर्क कार्यालयात पत्रकार परिषद घेण्यात आली.

संधान म्हणाले, सरकारी जागा बालवाडीच्या नावावर घेऊन बळकावणे, आरक्षण उठवून त्यात हिस्सा मागणे, भिशी चालविणे व छत्रपती शिवाजी महाराजांचे स्मारक उभारण्यासाठी लकी ड्रॉ चालविणे हे धंदे कुणी केलेत हे शहरवासीयांना चांगलेच माहिती आहे. आता तुम्हाला जर माझ्या व्यवसायात यायचंच असेल तर तुमचे ‘वेलकम’ आहे.

उपनगराध्यक्ष स्वप्नील निखाडे म्हणाले, गेल्या साडेचार वर्षात चुकीच्या कामांना मी नगराध्यक्षांना सभागृहात विरोध करीत असल्याने माझ्यावर आर्थिक व्यवहाराचे आरोप करून माझ्या बदनामीचे षडयंत्र करीत आहे. परंतु, त्याला मी भीक घालणार नाही.

......